SPAK vë nën sekuestro 5 pasuri të Oltian Bistrit me vlerë rreth 1 milion euro
Ish- shefi i Forcave të Posaçme Operacionale, në burg për 11 akuza të rënda Ish- shefi i Policisë u lëviz nga drejtoria me urdhër të kryepolicit të vendit, pak ditë para se të vihej në pranga nga “Metamorfoza”
SPAK dje njoftoi zyrtarisht se i ka sekuestruar pasuritë ish- kreut të Forcës Operacionale, Oltian Bistri.
Vlera e kësaj sekuestroje shkon rreth 1 milion euro, ndërkohë një prej drejtuesve të skuadrës më efeciente të policisë është nën hetim dhe dyshim për akuza të rënda, siç janë grupi i strukturuar kriminal, i përfshirë në vrasje, pengmarrje, trafik droge dhe korrupsion. Drejtuesi i skuadrës Operacionale në Policinë e Shtetit u prangos në korrikun e vitit që lamë pas, në kuadër të operacionit “Metamorfoza”, iniciuar nga hetuesit francezë, të cilët sollën në duart e Prokurorisë së Posaçme qindra e mijëra faqe me përgjime të dala nga bisedat e personazheve të grupit kriminal me ‘ seli’ në Shkodër. Bashkë me Bistrin në pranga ranë edhe biznesmeni Pëllumb Gjoka, investitor strategjik i Velipojës, prokurori i Kukësit, por që kishte qenë më herët prokuror në Shkodër, Xhevahir Lita dhe punonjësi i policisë Ardit Hasanbega. Në atë operacion të mirorganizuar u prangosen edhe 11 persona të tjerë, ndërkohë që nga përgjimet e publikuara janë përftuar biseda të frikshme pazaresh dhe planesh për ekzekutime personash.
Hetimet për pasurinë e Bistrit
Nga njoftimi që bëri SPAK në lidhje me sekuestron ndaj pasurive të ish- kreut të Operacionales mësohet se “nga verifikimet e kryera gjatë këtij hetimi është evidentuar se që nga viti 2015 e në vijim, i hetuari Oltian Bistri dhe familjarët e afërm të tij kanë kryer disa transaksione të dyshim
ta në lidhje me shitjen dhe blerjen e pasurive të paluajtshme në një vlerë totale rreth 1 milion euro”. Prokuroria e Posaçme mësohet se ka vendosur të sekuestrojë konkretisht 3 apartamente në Tiranë, prej të cilëve 2 me sipërfaqe nga 400 m2 në Tiranë dhe me çmim nga 200 mijë euro secili dhe i treti me sipërfaqe 110.6 m2 me çmim rreth 50 mijë euro, si dhe dy dyqane po në Tiranë, një me sipërfaqe 125 m2 me çmim 300 mijë euro dhe tjetri me sipërfaqe 95 m2 me vlerë 230 mijë euro. Megjithatë, do të jetë gjykata ajo që do të vendosë përfundimisht mbi fatin e pasurive të shefit të Opracionales. Por në lidhje me pasuritë e dyshimta, Bistri ka qenë edhe më herët objekt hetimi pasi për vetë pozicionin që mbante iu nënshtrua një hetimi kalimtar. Por gjatë këtij hetimi në kuadër
të rivlerësimit, Bistri u lëviz nga detyra e drejtorit të Operacionales dhe u kalua tek një sektor i ri që u hap në Policinë e Shtetit. Ishte vetëm pak ditë para se ai të vihej në pranga kur drejtori i Policisë e dërgoi në rolin e specialistit në sektorin e ‘ Krimeve në Volum’. Për pasojë në momentin e arrestimit, ai në fakt nuk ishte më drejtues i Forcës Operacionale e trupa e rivlerësimit të Agjencisë së Mbikëqyrjes Policore e ndërpreu pa dalë në një vendim përfundimtar procesin e vetingut ndaj Bistrit, duke i mënjanuar edhe hetimin pasuror. Argumenti i tyre lidhej me ndryshimin në pozicionin e punës duke e konsideruar jo kompetente për ‘ misionin’ e tyre. Por në momentin që ai u arrestua bashkë me një mori personash të tjerë nën 11 akuza, për të cilat SPAK pretendon se ka prova për secilën prej tyre ku është i implikuar, nuk u fol për hetim pasuror, ndonëse prokurorët e çështjes dyshojnë se përveç konsumimit të veprës penale të korrupsionit pasiv dhe aktiv, ai dyshohet edhe për pastrim parash. Metamorfoza që çoi në pranga Bistrin, zbuloi një grup kriminal gjakësor ku në fokus të akteve të tyre kriminale ishin një tjetër grup nga Shkodra, prej të cilëve rezultonte i vrarë edhe një i ri nga Laçi i Vaut të Dejës. Njoftimi i SPAK: Prokuroria e Posaçme kundër Korrupsionit dhe Krimit të Organizuar ka në hetim procedimin penal nr. 9 të vitit 2023, regjistruar për veprat penale “Vrasja me paramendim”, “Korrupsioni pasiv i gjyqtarëve, prokurorëve dhe funksionarëve të tjerë të organeve të drejtësisë”, “Korrupsioni aktiv i gjyqtarit,
prokurorit dhe i funksionarëve të tjerë të drejtësisë”, “Heqja e paligjshme e lirisë”, “Shpërdorimi i detyrës”, “Ekspertimi i rremë”, “Falsifikimi i dokumenteve”, “Trafikimi i narkotikëve”, “Mbajtja pa leje e armëve dhe prodhimi i armëve, armëve shpërthyese dhe municionit”, në bashkëpunim në formën e “Grupit të strukturuar kriminal”, “Kryerja e veprave penale nga organizata kriminale dhe grupi i strukturuar kriminal”, “Pastrimi i produkteve të veprës penale ose veprimtarisë kriminale”, të parashikuara nga nenet 78, 319/ ç, 319, 110, 248, 309, 278, 283/ a, 333/ a, 334, dhe 287 të Kodit Penal. Në kuadër të këtij procedimi penal po hetohet nën masën e sigurimit “arrest në burg”, parashikuar
nga neni 238 i K. Pr. Penale shtetasi O. B. Nga hetimet e kryera dhe provat e administruara nga hetimi i deritanishëm i këtij procedimi është evidentuar se që nga viti 2015 e në vijim i hetuari O. B. dhe familjarët e afërm të tij kanë kryer disa transaksione të dyshimta në lidhje me shitjen dhe blerjen e pasurive të paluajtshme në një vlerë totale rreth 1 000 000 ( një milion) Euro. Ndërkohë vazhdojnë me intensitet hetimet në kuadër të procedimit penal nr. 09/ 2023 me qëllim sqarimin e plotë të fakteve objekt hetimi, sqarimin e plotë të përgjegjësisë penale për të gjithë personat e përfshirë, si dhe hetimin e plotë financiar të gjithë të dyshuarve si autorë të veprave penale objekt hetimi.