Shoqata e autoshkollave kundër, kërkohet formalizimi i tregut

Shoqata e autoshkollave ka reaguar një ditë pas rritjes së kostove për patentat, rritje që në fakt prek të gjithë procesin që nga regjistrimi e deri te rinovimi i kartonit të lejes së dertimit. Në 16 janar DPSHTRR ka bërë rishikimin e një sërë tarifash për shërbimet e lejedrejtimit, të cilat do të hyjnë në fuqi nga 5 shkurti. Regjistrimi për provimin e teorisë është bërë 2000 lekë, ndërsa regjistrimi për provimin e praktikës për kategorinë B është bërë 1800 lekë. Ndryshime ka edhe për tarifat e riprovimeve, ku për teorinë, kategoria B është bërë 2200 lekë, ndërsa për kategoritë e tjera shtesë, 2800 lekë. Gjithashtu tarifa për testin e rimarrjes së pikëve është vendosur në 5000 lekë. Ndryshime ka edhe për tarifat e kartonit të patentës. Ato janë rritur me 1000 lekë, por afati i tyre është zgjatur në 15 vjet. DPSHTRR thotë se kjo u kursen qytetarëve para. Rritje ka pësuar edhe tarifa për kartonin e patentës ndërkombëtare në 1000 lekë, por afati i vlefshmërisë është zgjatur në 3 vite. Grup- mosha mbi 65 vjeç ka lehtësinë më të madhe pasi për ta tarifa e patentës ulet në 2000 lekë me afat 15 vite. Shoqata kombëtare e autoshkollave shprehet e shqetësuar për njoftimin, pasi sipas tyre, nuk kanë qenë pjesë e konsultimeve, ndërsa kostot për patentat e reja rriten me minimalisht 5000- 6000 lekë. Shoqata e autoshkollave kërkon formalizimin e mëtejshëm të tregut. Në një marrëveshje gjatë vitit të kaluar DPSHTRR dhe shoqatat e autoshkollave miratuan çmimet për një orë mësimi, gjë që solli mjaft reagime për rritjen e tarifës. Vendimi u shty për hyrjen në fuqi, pasi Autoriteti Konkurrencës vendosi të pezullonte marrëveshjen si cenim i konkurrencës në treg.