Inovacioni financiar, Rama: Ndryshimet, pensionet do të merren me bankë
"Që këtë vit, pensionistë dhe biznese që operojnë përmes sistemeve bankare. Duam rënie reale të cash në qarkullim. S'ka justifikime"
Kryeministri Edi Rama u bëri thirrje përfaqësuesve të sistemit bankar dhe të industrisë së re "Fintech", që të bashkëpunojnë dhe brenda këtij viti të sjellin inovacion dhe ndryshim real në transaksionet financiare në vend.
Gjatë fjalës së tij, nga "Shtëpia e Biznesit" ose "Piramida" ku zhvilloi një takim me përfaqësuesit e sistemit bankar dhe të industrisë së re "Fintech", mbi nevojën për shtrirjen e modernizimit të shtetit në digjitalizimin e shërbimeve financiare, Rama theksoi se Banka e Shqipërisë duhet të ketë patjetër një mekanizëm supervizimi dhe të inovacionit, edhe të ecurive të punës me inovacionin. Sipas tij, Shqiperia nuk mund të jetë një vend që vazhdon me një volum cashi të papranueshëm në qarkullim te parave. Për këtë arsye, kryeministri kërkoi ofrimin e më shumë zgjidhjeve alternative në fushën e pagesave për të ulur koston e transaksioneve, informalitetit dhe të qarkullimit të parasë dorë më dorë. "Duam ndryshim të shpejtë dhe real, jo pas disa vitesh por këtë vit. Pensionistë që marrin pensionet përmes sistemeve të reja, biznese që shesin me këto
sistemi. Duam të shikojmë rënie reale të cash në qarkullim, rritje reale të transparencës së parasë dhe të ardhurave për vendin. Këtë duam ta bëjmë në mirëkuptim të plotë dhe paqe, por në të gjitha rastet do ta bëjmë patjetër, se nuk pranojmë dot këtë inerci të tmerrshme. BSH ta udhëheqë këtë proces me shumë forcë", tha Rama duke iu kërkuar përfaqësuesve të sistemit bankar të jenë në lartësinë e kësaj sfide ku vendi ynë duhet medoemos të shkëlqejë në Evropë, sipas kreut të qeverisë. "Të gjitha justifikimet, arsyetimet, të gjitha ato alibitë që vijnë nga prishja e zonës së komfortit dhe që vijnë nga prishja e një statusquo të krijuar me vite e me vite, ne nuk do t'i pranojmë. Çdo gjë që e bën një vend tjetër, s'ka pse nuk e bën Shqipëria. Madje Shqipëria duhet të jetë e gatshme të bëjë edhe gjëra që vendet e tjera akoma nuk i kanë bërë", shtoi Rama. Kryeministri Edi
Rama theksoi se janë 3 drejtime ku Shqipëria duhet të jetë kampione në Europë, dhe ato janë turizmi, energjia dhe inovacioni. Te kjo e fundit, Rama iu la afat bankave që brenda këtij viti duhen parë rezultate konkrete dhe domethënëse në fushën e digjitalizimit të shërbimeve financiare.
Gjatë fjalës së tij, kryeministri përmendi edhe daljen e shqipërisë nga lista gri e Moneyval dhe në këtë kontekst, sipas tij, bankat kanë më tepër përgjegjësi. "Më kujtohet kur kemi bërë bisedën me bankat e nivelit të dytë për sigurinë kibernetike, kur kemi folur për domosdoshmërinë e marrjes seriozisht të kërcënimit kibernetik dhe u desh të ndodhte, që pastaj bankat të vihen në lëvizje. Kemi një sistem bankar që ka të gjitha virtytet pozitive të një sistemi tradicional. Jemi të kënaqur me këtë. S'jemi më në listën gri dhe i kemi të gjitha arsyet të kërkojmë me zë të lartë nga bankat që të jenë në lartësinë e kësaj sfide, që është sfida e Shqipërisë".
Në takimin me temë "Inovacioni në Sistemin Financiar" morën pjesë kryeministri Edi Rama, ministri i Financave, Ervin Mete, ministrja e Shtetit për Sipërmarrjen dhe
Klimën e Biznesit, Delina Ibrahimaj, Guvernatori i Bankës së Shqipërisë, Gent Sejko dhe drejtues të Shoqatës së Bankave, sektorit bankar dhe institucioneve të parasë elektronike. Përgjatë takimit të mbajtur në Shtëpinë e Biznesit për ofrimin
e më shumë zgjidhjeve alternative në fushën e pagesave përfaqësuesit e bankave bënë të ditur se këto të fundit ndodhet në periudhë testimesh dhe se në qershor do të jenë të gjitha gati për të dalë "live" në qershor sa i takon "open banking".