Ish- ministri i Shëndetësisë, Ilir Beqaj dhe rektori i Mjekësisë në SPAK
Ish- ministri i Shëndetësisë, Ilir Beqaj është paraqitur sërish ditën e djeshme në Prokurorinë e Posaçme. Nuk dihet se pse ish- ministri është paraqitur në SPAK, ndërsa ndaj tij, me kërkesë të SPAK, në nëntor 2023, GJKKO ka caktuar masën detyrim paraqitje për akuzën shpërdorim detyre. Por ish- ministri i Shëndetësisë, Ilir Beqaj pas daljes së tij nga SPAK, ku qëndroi për rreth 40 minuta, u ndal në një prononcim për mediat. "Sot ishte e premte, që është dita e paraqitjes. Mora dhe hard drive me të dhënat e laptopit, që u sekuestruan në apartamentin tim në 28 dhjetor. Ditë të mbarë!", tha Beqaj. Edhe rektori i Universitetit të Mjekësisë, Arben Gjata është paraqitur sot në SPAK, pasi gjykata ndaj tij ka caktuar ' Detyrim paraqitje' nga GJKKO për çështjen e "Sterilizimit". Ndaj Beqajt me kërkesë të SPAK, në nëntor 2023, Gjykata ka caktuar masën detyrim paraqitje për akuzën shpërdorim detyre. Hetimi bën fjalë për shkeljet e pretenduara nga SPAK, në koncesionin e sterilizimit me vlerë 100 milionë euro dhe afat 10- vjeçar, të fituar nga biznesmeni Ilir Rrapaj tashmë i arrestuar bashkë me ishzv. ministrin e Shëndetësisë, Klodian Rrjepaj. Ndërsa po zbaton masën e caktuar nga GJKKO për këtë çështje, një hetim paralel ka nisur për të për dyshime që lidhen me fondet e huaja, të koordinuara nga SASPAC, Agjencisë Shtetërore e Programimit Strategjik dhe Koordinimit të Ndihmës, ku Beqaj ishte drejtor. SPAK ka dyshime për korrupsion dhe shpërdorim detyre të Beqajt, por nuk ka të regjistruar një procedim, ndërkohë që ndaj tij është ushtruar kontroll banese dhe janë sekuestruar telefoni, kompjuteri dhe dokumente të tjera. Kontrolle janë ushtruar edhe në banesat e 5 anëtarëve të tjerë të SASPAC.
REKTORI ARBEN GJATA
Arben Gjata është paraqitur në SPAK në zbatim të vendimit të gjykatës. Ndaj rektorit të Universitetit të Mjekësisë është caktuar masa detyrim paraqitje pranë oficerit të Policisë Gjyqësore.
Arben Gjata, i cili është edhe shefi i kirurgjisë është një nga personat e akuzuar për çështjen e koncesionit të sterilizimit. Në kohën kur u lidh koncesioni më dhjetor të vitit 2015, ai ka pasur detyrën e anëtarit të komisionit të koncesionit të sterilizimit.
Kujtojmë që me urdhër të SPAK për koncesionin e sterilizimit me vlerë 100 milion euro janë arrestuar ishzv. ministri i Shëndetësisë Klodjan Rjepaj dhe biznesmeni Ilir Rrapaj, pronari i kompanisë ' Investital LLC'. Po ashtu, ish- ministri i Shëndetësisë, Ilir Beqja dhe ai i Financave, Shkëlqim Cani janë nën hetim nga Prokuroria e Posaçme për koncesionin kontrovers të sterilizimit të pajisjeve kirurgjikale, ndërkohë që ish- zv. ministri Klodian Rrjepaj dhe biznesmeni Ilir Rrapaj u arrestuan të enjten në zbatim të masave të arrestit të firmosura nga Gjykata e Posaçme thuajse dy muaj më parë.