Bylykbashi: Skenari i PS- së për të marketuar reformën si gjithëpërfshirëse
Kalimi “online” i Komisionit të Reformës Zgjedhore duke lënë jashtë përfaqësimit shumicën brenda grupit të demokratëve, për Oerd Bylykbashin, minon gurin e themelit për një proces gjithëpërfshirës, ndaj dhe bashkëdrejtimin e tryezës nga dyshja GjiknuriAlibeaj e sheh si vijim të pazarit mes Bashës e Ramës, që nga 18 maji i vitit 2017. “Qartazi Rama nuk kërkon konsensus, por ka dalë në një ekspeditë peshkimi për vota dhe ky peshk që mund t’i garantojë këtë tepsinë e Reformës Zgjedhore është Basha”, - tha ai. Bylykbashi zbërthen një ndër skenarët më të mundshëm, që sipas tij, mazhoranca do vërë në zbatim për ta marketuar këtë reformë si gjithëpërfshirëse me të zgjedhurit e Lulzim Bashës në tryezë. “Mund të jetë rënë dakord në dhomë të mbyllur për ta veshur me një mantel konsesualizmi të rremë”, - theksoi Bylykbashi. Në funksion të këtij pazari sheh edhe propozimet e Bashës për ndryshimin e sistemit zgjedhor, përmes të cilave synohet të ndryshohet edhe Kushtetuta. “Proporcional kombëtar me prim. Primi garanton Ramën që të mos zbresë kurrë”, - tha ai. Bylykbashi pranon që sistemi aktual është toksik, por shprehet se nëse palët ulen në tryezë mund të gjendet një formulë që garanton proporcionalitet. “Vret pluralitetin e partive në Parlament. Cili është sistemi? Mund të fillojë që nga mazhoritari”, - tha Bylykbashi. Pjesë të pazarit sheh edhe mundësinë e ndryshimit të hartës territoriale. “Uroj të mos jetë kjo marrëveshje më jep një kalë të të jap një gomar siç ishte marrëveshja me jep vetingun, të të jap Reformën Territoriale”, - deklaroi ai.