I dogji makinën dhe tentoi t’i digjte edhe banesën, 41- vjeçarja: Ia kam blerë unë!
Një ngjarje e rëndë është shënuar në qytetin e Durrësit, ku një 41- vjeçare është identifikuar si autorja e vënies së zjarrit në makinën e ish- të dashurit të vet. Sipas të dhënave të policisë, gruaja, pasi i ka djegur makinën ka tentuar t’i djegë edhe shtëpinë, por është ndërhyrë në kohë dhe më pas policia e ka shoqëruar në komisariat. Në rrëfimin e saj, autorja ka pretenduar se si makinën ashtu edhe shtëpinë i kishte blerë ajo dhe madje i kishte vënë edhe në emër të bashkëjetuesit, i cili më pas ka vendosur të ndahet me të, por ka mbajtur në posedim jo vetëm makinën, por edhe apartamentin. Policia e Durrësit ka treguar përgjatë ditës së djeshme detaje rreth ngjarjes ku një 41- vjeçare, me ndihmën e vëllait dogjën një makinë. Bëhet me dije se Dorina Stafaj kishte pasur një lidhje disavjeçare me 42- vjeçarin me inicialet K. S., por kishte zbuluar së fundmi se partneri komunikonte me të tjera. Ndonëse 41- vjeçarja jetonte në Itali ku kishte edhe një qendër estetike, ndërsa me të ardhurat e fituara nga puna kishte tentuar të investonte dhe në qytetin bregdetar. Stafaj kishte blerë një apartament dhe një makinë ( mjeti që iu vu zjarr), ndërkohë që i kishte regjistruar në emër të partnerit të saj. Por pas sherreve dhe dyshimeve se ai e tradhtonte, Stafaj, në bashkëpunim me vëllain e saj, kishte ndërmarrë hapin ekstrem, duke i vënë zjarrin makinës, pasi kishte pohuar se ishin prona që ajo i kishte blerë me të ardhurat e saj. Madje, ata tentuan që të digjnin dhe banesën, por ngjarja në fjalë është parandaluar. Sakaq, në kërkim është shpallur vëllai i saj, 35vjeçari me inicialet M. S., ndërsa në gjendje të lirë po hetohet shtetasi italian me inicialet F. C., 58 vjeç, për moskallëzim krimi.