Prangoset laçiani, qëlloi mbi makinën e ish- deputetit Armando Prenga
Rreth një vit më parë, një ngjarje u raportua në zonën e Kurbinit ku u bë me dije se ishte qëlluar me armë zjarri mbi automjetin e ish- deputetit të Partisë Socialiste, Armando Prenga. Ishte vetë ky i fundit që pasi shkoi në komisariatin e Laçit dëshmoi se dyshonte se e kishte qëlluar një person, me të babanë e të cili ishte konfliktuar në procesin e votimeve për zgjedhjet e pushtetit lokal. Që në atë kohë i riu u shpall në kërkim nën akuzën e rëndë të vrasjes së mbetur në tentativë, ndërkohë që policia e Lezhës e ka njoftuar arrestimin e tij ditën e djeshme. Bëhet fjalë për 31vjeçarin Fatbardh Ismailaj, i arrestuar në shtëpinë e tij.
Policia bëri me dije se: Qëlloi me armë zjarri në muajin maj të vitit kaluar, në drejtim të një shtetasi në lëvizje me automjet, kapet dhe vihet në pranga 30- vjeçari, i kërkuar prej disa muajsh. Operacioni për kapjen e tij nga shërbimet e Komisariatit të Policisë Kurbin në bashkëpunim me Forcat Kombëtare të Sigurisë ( FKS). Në zbatim të planit të masave të hartuar në kuadër të operacionit mbarëkombëtar “Sundimi i ligjit” për kapjen e personave në kërkim, nga shërbimet e Komisariatit të Policisë Kurbin në bashkëpunim edhe me Forcat Kombëtare të Sigurisë ( FKS) bazuar në informacionet e siguruara nga inteligjenca policore mbi vendndodhjen në fshatin Gurëz, njësia administrative Fushe Kuqe, Kurbin, të një personi në kërkim, është organizuar puna operacionale ku si rezultat u kap dhe u ndalua shtetasi F. I. 30 vjeç, banues në Fushe Kuqe, Kurbin. 30- vjeçari ishte shpallur në kërkim kombëtar pasi Gjykata e Shkallës së Parë Lezhë me vendim penal datë 25.05.2023, ka caktuar ndaj tij masën e sigurisë “arrest me burg” për veprat penale “Vrasje me dashje’ mbetur në tentativë” dhe “Mbajtja pa leje dhe prodhimi i armëve, armëve shpërthyese e municioneve”. Më datë 17 maj 2023, në Fushë Kuqe, i ndaluari F. I., ka qëlluar me armë zjarri në drejtim të automjetit në lëvizje të drejtuar nga shtetasi A. P. 49 vjeç. Materialet procedurale iu referuan Prokurorisë, për veprime të mëtejshme.