Tuhel: Mbrotja e M'gladbah na e bëri të vështirë, por Kejn...
Tomas Tuhel ia doli të merrte fitoren që i jep më shumë zjarr ekipit përpara duelit të drejtpërdrejtë me Leverkusen, e planifikuar të luhet këtë të shtunë. Mungesat e shumta janë një problem që ende zien në Mynih, por tekniku 50vjeçar ka ditur të alternojë ekipin edhe në këtë situatë të vështirë. Pas hipotekimit të suksesit, Tuhel ka lavdëruar mbrojtjen mike, sikurse punën e Herri Kejn, ndërsa ka lënë pa përgjigje dëshirën e Myler rreth prezencës nga minuta e para ndaj Leverkusenit: "Ishim të qetë edhe pas pësimit të golit nga rivali, sikurse reagimi i duhur pa u mbyll pjesa e parë. Borusia Mënshengladbah u mbrojt në trajtë të përsosur. Mbulimi i tyre në zona të ngushta dhe presioni i lartë në momente të caktuara na vendosën në vështirësi. Herri Kejn bëri detyrën si finalizues i vërtetë dhe zgjidhi ndeshjen. Myler meriton respekt maksimal pas kësaj arritjeje fenomenale. Nuk njoh ndonjë lojtar të grumbullojë kaq shumë fitore me një skuadër. E di që do të jetë problem për Leverkusen inkuadrimi tij nga fillimi, ndonëse ka ende ditë dhe do më duhet të marr kohën e mjaftueshme në përpilimin e takimit të ardhshëm", vijoi Tuhel. "Timonieri" i bavarezëve foli shkurtimisht edhe mbi faljen e Ditmar Haman, teksa ish- lojtarin gjerman e cilësoi trajneri "të paturpshëm" rreth superlativave për futbollin spanjoll, ndërkohë që mban "frerët" e Bajernit: "Frazat që pohova, Haman i nxori nga konteksti dhe i përpunoi sipas mënyrës së tij. U bë e qëllimshme dhe falja nuk merr vlerë. Të gjithë u tronditëm se çfarë po përhapej në media në linjë të papërgjegjshme me autorë Ditmarin", e mbylli Tuhel.