Protesta, Noka: Rama e ktheu kuvendin në kullë ngujimi të krimit e të bandave
Deputeti demokrat, Flamur Noka gjatë fjalës së tij në protestën e opozitës u shpreh se Edi Rama ka urdhëruar bllokimin e Parlamentit duke e kthyer këtë të fundit në kullë ngujimi të krimit e të bandave. “Nuk i bëri ballë dot as Enver Hoxha dhe nuk mund t’i bëj ballë as Edi Rama dhe ndaj sot ai i tmerruar urdhëroi bllokimin, urdhëroj që ai që duhet të ishte parlamenti i qytetarëve të kthehet në kullë ngujimi të krimit e të bandave. Urdhëroj që të mos lejohen deputetët e opozitës. Po ku ka Edi Ramë që mund të frenojë dhe mund të ndalojë vullnetin tuaj dhe mund t’ju bëj ballë të gjithë njerëzve të lirë dhe ndaj sot është një ditë e shënuar në aksionin tonë opozitar. Ne sot jemi të gjithë për t’i thën çdo shqiptari çohu sepse sot është dita, o sot o kurrë. Ne jemi këtu për t’i thënë çdo qytetari të lirë të këtij vendi edhe çdo socialisti, bashkohu se beteja jonë nuk është betejë vetëm për vetën tonë por është për Kushtetutën, është për pluralizmin ndaj bashkohu me ne, është për një drejtësi të pavarur dhe për një shtet normal dhe jo për një drejtësi që përdoret hanxhar në duart e Edi Ramës dhe regjimit për të burgosur opozitën”, - tha Noka. Sipas tij qytetarët shqiptarë e morën mesazhin që duhej nga numri dy i Partisë Socialiste. Ai iu bëri thirrje qytetarëve t’ju bashkohen në protesta pasi opozita është e vendosur të mos ndalojë derisa të kthejë pluralizmin e munguar. “Çohuni të luftojmë se bashku t’i kthejmë çdo shqiptari tokën, atdheun, lirinë e shpresën. Ne duhet të vrasim frikën dhe kjo protestë tregon që ju e vratë frikën sepse Sali Berisha është i burgosur politik. Ja ku jemi nuk ka pranga për të gjithë shqiptarët e demokratët. Ne do të jemi këtu dhe asgjë nuk na ndalon në rrugëtimin tonë derisa të kthejmë pluralizmin e munguar dhe Shqipërisë dinjitetin, - u shpreh Noka.