“Xhaçka”, Kryetarja Zaçaj: Po vënë në dyshim zbatimin e vendimit të Kushtetueses
“Vendimet e GJK janë të formës së prerë dhe janë përfundimtare” GJK rrëzoi Kuvendin e pranoi padinë e Alibeajt, duk e shpallur si antikushtetues vendimin e PS- së për të mos e çuar në GJK legjitimitetin e mandatit
Kryetarja e Gjykatës Kushtetuese, Holta Zaçaj, shprehu dje shqetësimin për moszbatimin e vendimit të GJK- së, për mandatin e deputetes Olta Xhaçka.
Zaçaj theksoi se vendimi i gjykatës është vënë në pikëpyetje nga qeveria dhe Kuvendi, që sipas saj, është e paimagjinueshme që të ndodhë në një shtet ligjor. Ajo bëri të qartë se vendimet e GJK janë të formës së prerë dhe përfundimtare. GJK rrëzoi Kuvendin për Xhaçkën dhe pranoi padinë e grupit të Alibeajt, duke shpallur si antikushtetues vendimin e PS për mos ta çuar në GJK legjitimitetin e mandatit të deputetes. “Të vësh në pikëpyetje zbatimin e vendimit të Gjykatës Kushtetuese është e paimagjinueshme në një shtet ligjor. Vendimet e Kushtetueses janë të formës së prerë dhe janë përfundimtare. Do të thotë që ato janë të zbatueshme. Nuk ka ekuivok në vendimet e Gjykatës Kushtetuese. Për sa kohë që janë përcaktuar si të tilla, kanë forcën e ligjit dhe nuk mund të diskutohen, vetë Kushtetuta nuk i ka dhënë gjykatës mekanizma kontrolli të zbatimit të vendimeve sepse në një shtet ligjor është postulat që vendimet e GJK janë të zbatueshme. Nuk do të komentoj më tej”, - theksoi Zaçaj. Kuvendi i Shqipërisë do të duhet të shprehet me patjetër për çështjen e mandatit të deputetes Olta Xhaçka. Kjo pasi, Gjykata Kushtetuese, pas shqyrtimit të dy padive të ngritura nga Partia Demokratike, e detyron Kuvendin që të shprehet mbi këtë çështje. Kushtetuesja ka vendosur pranimin e dy kërkesave të ngritura nga deputetët e Partisë Demokratike, të ndarë në dy grupe duke shfuqizuar raportin e Këshillit të Rregullores. Kuvendi do të duhet të bëjë një raport të ri në lidhje me kërkesat e depozituata nga PD dhe më pas, vendimi i Kuvendit mund të kalojë në Kushtetuese.
PAKTI PËR EMIGRANTËT DHE “BELERI”
Kryetarja e Gjykatës Kushtetuese, Holta Zaçaj, u pyet edhe për marrëveshjen Rama– Meloni për emigrantët, për të cilën GJK dha “OK”. Zaçaj është shprehur se vendimi është duke u punuar, por me atë që është bërë publike deri më tani, sipas saj shteti shqiptar vijon të ketë juridiksion lidhur me zonat ku do të ndërtohen kampet. “Vendimi është duke u punuar. Do i përmbahem deklaratës për shtyp. Gjykata tha me bindje se shteti shqiptar vijon të ketë juridiksion. Thamë që përgjegjësia e shtetit shqiptar vazhdon të mbetet, nuk mohuam përgjegjësinë e shtetit shqiptar lidhur me këto zona, e pamë juridiksionin e shtetit italian në funksion të detyrimeve që ka shteti italian në bazë të se drejtës ndërkombëtare. Ajo që ne thamë në kuptimin e juridiksionit të dyfishtë apo ekstraterritorial që lind, ne këtë e pranuam si një gjë faktike që ndodh, marrëveshja futet në hierarkinë e normave. Është e vendosur në një rang hierarkik nga vetë Kushtetuta. Konventa europiane e të drejtave të njeriut është në nivel kushtetues. Në këtë kuadër juridiksioni që vjen nga Kushtetuta, vijon të mbetet dhe nuk vihet në diskutim”, - tha Zaçaj. Kryetarja e Gjykatës Kushtetuese, u pyet nga gazetarët e pranishëm edhe për ankimin e kryebashkiakut të zgjedhur të Himarës
Fredi Beleri. Zaçaj tha sa Gjykata ka marrë në shqyrtim çështjen në shtator, ndërkohë që gjykata është ende te dosjet e majit. “Në lidhje me Belerin, dua t’ju vej në dijeni, se Gjykata ka marrë në shqyrtim çështjen dhe ka vendosur kalimin e saj në seancë plenare, në shtator. Ne nuk kemi filluar ende. Jemi duke shqyrtuar çështje të majit. Është duke iu përgatitur. Në Gjykatën Kushtetuese në momentin që bëhet gati dhe relatori është gati, merret në zbatim. Në këtë çështje nuk më rezulton të kërkesë për përshpejtim. Dy kërkesat e tjera janë paraqitur 1 dhe 10 janar dhe nuk janë marrë ende në shqyrtim”, - tha Zaçaj.
DOSJET
Kryetarja e GJK informoi se institucioni që ai drejton, nuk ka dosje stok, ndryshe nga sa ndodh në gjykatat e tjera. Në analizën vjetore të gjykatës Kushtetuese, Zaçaj, u shpreh se gjatë vitit 2023 janë regjistruar 452 kërkesa. “Shqyrtimi rezulton me kohëzgjatje afro 8 muaj, 452 kërkesa ishin në total në 2023, ku 367 kërkesa të regjistruara në vitin 2023 dhe 85 kërkesa ishin të mbartura nga viti 2022. Në vitin 2023 u regjistruan 452 kërkesa në Gjykatës Kushtetuese. Kjo gjykatë nuk ka stok të çështjeve të prapambetura si gjykatat e tjera. Kemi pasur 6 vendime, të cilat janë kërkesa të paraqitura nga një grup deputetesh, 3 nga organizatat, 2 nga gjykatat dhe 59 nga individë. Ndërkohë, 30 vendime janë marrë unanimisht, ndërsa 40 me shumicë votash. Në vitin 2024 janë mbartur 93 çështje nga viti 2023”, tha Zaçaj. “Trupa gjyqësore e plotësuar ka trajtuar çështje të rëndësishme. Parimet që e kanë udhëhequr gjykatën janë paanshmëria, transparenca dhe eficienca. Duke u kujdesuar dhe angazhuar për të respektuar afatet procedurale dhe dhënies së argumentimeve të vendime, gjykata ka synuar cilësinë e vendimmarrjes”, - tha Zaçaj. Zaçaj vuri në dukje se buxheti nuk ka qenë i pamjaftueshëm. “Gjykata ka bërë përpjekje të vazhdueshme për përmbushjen e objektivave me qëllim dhënien e një drejtësie funksionale. Në kushtet e një buxheti të panevojshëm gjykata mori nisma konkrete për përmirësimin, miratimin e rregullores për funksionimin e administratës, rregulloren për komunikimin e gjykatës me median dhe ridimensionimi i marrëdhëniet me të dhe publikun”, - tha Zaçaj. Ajo përmendi se “Sot rroga e gjyqtarit në GJK është 390 000 lekë bruto, 290 000 lekë neto, e krahasueshme me gjyqtarin e gjykatës së shkallës së lartë, pra e krahasueshme. Dhe sipas piramidës ne duhet të jemi gjyqtarët më të paguar. Vendimet kushtetuese kanë përgjegjësinë më të madhe”.