Nga Kosova në Shqipëri, sekuestrohen 203 kallëpe eksploziv tek Ura e Gjolës
Gjashtë persona në pranga e 2 në kërkim janë rezultatet e dy operacioneve antieksploziv në kryeqytet, lënda për grupet kriminale
Dy operacione antieksploziv kanë sjellë në pranga disa tregtarë dhe t r a n s p o r t u e s , njëherësh edhe autorët e shpërthimit që ndodhi pak ditë më parë në një zyrë noterie në Tiranë.
Të dhënat e operacioneve i ka bërë me dije vetë kryepolici i Tiranës, Tonin Vocaj, i cili ndër të tjera ka theksuar se tregtarët janë shtetas shqiptarë të Kosovës, ndërkohë që tre të arrestuarit për vënien e lëndës shpërthyese te zyra noteriale janë nga Shqipëria dhe se ka dyshime të arsyeshme se ata janë paguar për të kryer aktin e rëndë kriminal. Kryepolici pasi tregoi emrat e autorëve të asaj ngjarjeje theksoi se janë vënë në pranga edhe tre shtetasit nga Kosova, të cilët janë kapur në Urën e Gjolës, ndërkohë që dy të tjerë janë shpallur në kërkim.
NJOFTIMI I POLICISË:
Drejtuesi i Policisë së Tiranës bëri me dije se gjatë këtyre 2 operacioneve u godit një rast i trafikimit të lëndëve eksplozive, u sekuestrua një sasi e konsiderueshme lënde eksplozive, si dhe u dokumentua me prova ligjore, ngjarja e ndodhur në rrugën “Perlat Rexhepi”, ku iu vendos lëndë plasëse një zyre noteriale.
Për të dyja rastet, autorët janë vënë në pranga. Seksioni për Hetimin e Trafiqeve të Paligjshme, i DVP Tiranë, pas një pune hetimore 4- mujore, në drejtimin e Prokurorisë pranë Gjykatës së Shkallës së Parë të Juridiksionit të Përgjithshëm Tiranë, duke përdorur metoda speciale të hetimit, bëri të mundur goditjen e një grupi kriminal nga Kosova, që kryente trafikim armësh dhe lëndësh eksplozive nga Kosova në drejtim të Shqipërisë. Si rezultat i mirorganizmit të punës në kuadër të operacionit policor të koduar “THE SAME”, më datë 04.02.2024, në afërsi të urës së Gjolës u bë arrestimi në flagrancë i shtetasve: Rigon Maliqi, 20 vjeç, Lion Pira, 25 vjeç dhe Shkëlqim Halabaku, 27 vjeç, të tre banues në Gjilan. Në kuadër të këtij hetimi, u shpallën në kërkim edhe 2 shtetas kosovarë. Gjithashtu, gjatë operacionit u sekuestruan 203 kallëpe me lëndë plasëse të dyshuar tritol TNT, me peshë 46 kg. Kjo sasi ishte destinuar për t’u përdorur nga grupe kriminale të ndryshme, në territorin e Republikës së Shqipërisë. Në kuadër të këtij procedimi janë sekuestruar edhe 3 celularë dhe 1 automjet. Më parë, në kuadër të këtij procedimi janë zhvilluar 2 operacione, j anë vënë në pranga 2 shtetas dhe janë sekuestruar 4 armë zjarri pistoleta, së bashku me krehra dhe municione luftarake, të cilat j anë trafikuar nga Kosova në drejtim të Shqipërisë. Po më datë 04.02.2024, nga strukturat hetimore të Komisariatit të Policisë Nr. 2, u finalizua operacioni policor i koduar “POROSIA”, në kuadër të të cilit u dokumentua me prova ligjore ngjarja e ndodhur më datë 30.01.2024, në një zyrë noteriale në rrugën “Perlat Rexhepi”, ku ka shpërthyer lëndë plasëse. Në kuadër të këtij operacioni, u ndaluan shtetasit: Real Zefi, 33 vjeç, banues në Shkodër; Korrado Katana, 33 vjeç, banues në Durrës; Eno Flamuraj, 36 vjeç, banues në Korçë.
Gjithashtu u shpallën ne kërkim 2 shtetas. Shtetasit e mësipërm, në bashkëpunim me njëritjetrin, më datë 30.01.2024, kanë vendosur sasi lënde plasëse në një zyrë noteriale dhe pas ngjarjes, autorët kanë lëvizur me motomjetin e shtetasit Eno Flamuraj. Më pas, motomjetin e kanë braktisur në liqenin e Farkës dhe pas kësaj janë larguar me automjetin tip “Audi”, të shtetasit Korrado Katana. Nga veprimet hetimore të kryera ka rezultuar se këta shtetas janë autorë të dyshuar të ngjarjes së ndodhur më datë 05.10.2023, në rrugën “Prokop Mima”, ku në lokalin e shtetases Sh. Gj., është vendosur një sasi lënde eksplozive. Nga veprimet hetimore të deritanishme ka rezultuar se këta shtetas e kanë vendosur lëndën eksplozive, kundrejt pagesës.