Operacioni në 5 shtete, bllokohen mbi 200 llogari bankare, pranga 67 trafikantëve
SPAK njoftoi se u kyçen 32 subjekte tregtare, 45 automjete, 4 motomjete e 19 pasuri të paluajtshme, por nuk identifikohen pasuritë
Një megaoperacion ndërkombëtar antidroge ka çuar në pranga 67 persona, mes të cilëve shumica janë shqiptarë.
Operacioni i një sërë policish ndërkombëtare mësohet se është shtrirë edhe në Shqipëri. Por përveç vendit tonë është ndërhyrë edhe në Holandë, Itali, Spanjë, Gjermani dhe Britani e Madhe. Rrjeti i drogës, sipas drejtuesve të operacionit trafikonte heroinë, kokainë dhe hashash dhe gjithnjë sipas tyre, për të fshehur mallin përdoreshin makina me dysheme të dyfishtë. Nga materialet që përbëjnë dosjen e hetimit italian, aty ku ishte edhe baza e këtij operacioni, mësohet se njeriu “kyç” në trafikun e drogës në Europë, është një i ri me emrin Kledion Muçollari, i cili nga Holanda trafikonte kokainën, ndërsa Shqipëria dhe Spanja ishin “hambarët” e tij të hashashit dhe të marijuanës. SPAK dje, me anë të një njoftimi ka bërë me dije disa detaje që lidhen me sekuestrimin e pasurive të këtij grupi kriminal në vlerën prej afro 5 milion eurosh. Por Prokuroria e Posaçme nuk bën me dije se kujt i përkasin konkretisht këto prona dhe aq më tepër se në çfarë rrethesh janë kryer sekuestrimet. Operacioni sipas tyre është koduar ‘ Muratori’ dhe hetimet nga italianët kanë nisur që në vitin 2021, në kohën kur agjencitë ligjzbatuese në vendin tonë bënin me dije se nuk kultivohej asnjë rrënjë hashashi dhe kanabisi në Shqipëri. Hetuesit italianë faktojnë me përgjime ambientale dhe me biseda telefonike mes trafikantëve se ata kanë transportuar drogë nga Shqipëria në drejtim të Italisë. Bëhet fjalë konkretisht për këto grupe kriminale që sipas SPAK janë goditur edhe ne qershorin e vitit që lamë pas.
NJOFTIMI I PLOTË I SPAK
Prokuroria e Posaçme ( SPAK) ka dalë me një njoftim zyrtar sa i takon operacionit të koduar “Muratori”, hetimet për të cilin kanë nisur që në vitin 2021, duke sjellë më pas arrestimin e 21 personave në Shqipëri në qershor të vitit 2023. Në njoftimin e SPAK bëhet me dije se falë bashkëpunimit me autoritetet italiane dhe Eurojust, ditën e sotme janë sekuestruar pasuri me vlerë 5 milionë euro ndërsa janë arrestuar 67 persona në Shqipëri, Itali, Gjermani, Spanjë dhe Mbretërinë e Bashkuar. Ndërsa ndaj 12 të tjerëve në Itali janë marrë masa të tjera ndaluese. Lidhur me këtë operacion, në Shqipëri janë sekuestruar: 32 subjekte tregtare, 45 automjete, 4 motomjete, mbi 200 llogari bankare, 19 pasuri te paluajtshme. “Me datë 05.02.2024 është finalizuar operacioni i koduar “Muratori”, i zhvilluar në kuadër të procedimit penal nr. 270 i vitit 2021, regjistruar për veprat penale të “Trafikimi i narkotikeve”, kryer në formën e posaçme të bashkëpunimit atë të grupit të strukturuar kriminal, “Grupi i strukturuar kriminal”, “Pastrim i produkteve të veprës penale ose veprimtarisë kriminale” dhe “Kryerja e veprave penale nga organizata kriminale dhe grupi i strukturuar kriminal”, parashikuar nga nenet 28/ 4, 283/ a, 287, 333/ a dhe 334 të Kodit Penal.
Hetimet e këtij procedimi penal janë kryer në kuadër të Skuadrës së Përbashkët Hetimore të krijuar ndërmjet Prokurorisë së Posaçme kundër Korrupsionit dhe Krimit të Organizuar dhe Prokurorisë së Firences, Seksioni Antimafia, Itali, me ndërmjetësimin e EUROJUST.
Autoritetet italiane dhe shqiptare kanë ndërmarrë veprime kundër një rrjeti të madh të trafikut të drogës, që vepron në të dy vendet. Me mbështetjen e Eurojust- it dhe Europol- it në një operacion në shkallë të gjerë, sot në datën 05.02.2024 u arrestuan 67 të dyshuar, në Shqipëri, Itali, Gjermani, Spanjë, dhe Mbretërinë e Bashkuar, dhe ndaj 12 të dyshuarve të tjerë u ndërmorën masa të tjera parandaluese në Itali. Rrjeti kryesisht trafikonte heroinë, kokainë, hashash duke përdorur makina me dysheme të dyfishtë ose ndarje të fshehta.
Vitin e kaluar, gjatë një operacioni kundër të njëjtit grup të krimit të organizuar u arrestuan në Shqipëri 21 shtetas shqiptarë. Ky operacion çoi gjithashtu në sekuestrimin e një sasie narkotikësh me vlerë prej 2.7 milionë eurosh”- saktëson SPAK. Po ashtu SPAK bën me dije se dy oficerë të Europolit u vendosën në Shqipëri dhe Itali gjatë ditës së operacionit për të mbështetur autoritetet kombëtare me masat e tyre hetimore. Operacioni u krye në terren me kërkesë dhe me mbështetjen e autoriteteve të mëposhtme: Itali:
Zyra e Prokurorisë Publike të Firences; Korpusi i Karabinierëve me mbështetjen e Ministrisë së Punëve të Brendshme Italiane – Shërbimi i Bashkëpunimit Ndërkombëtar Policor; Shqipëri: Struktura e Posaçme Kundër Korrupsionit ( SPAK); Policia e Shtetit; Agjencitë e zbatimit të ligjit të shtetit të Gjermanisë, Spanjës dhe Mbretërisë së Bashkuar.
ROLET E SHQIPTARËVE
Zbardhen rolet e disa prej shqiptarëve të arrestuar në kuadër të operacionit të koduar “Muratori’ në Itali ndërmarrë pas hetimeve të drejtorisë së antimafies italiane në Firence në bashkëpunim dhe me autoritetet italiane. Njëri grup siguronte kokainën në Holandë ndërsa hashashin dhe marijuanën në Spanjë dhe Shqipëri. Grupi drejtohej nga Kledjon Muçollari ndërsa bashkëpunëtori i tij i ngushtë ishte Ervis Vangjeli nga Vlora. Në dosjen e antimafies thuhet se ky grup aktivitetin e tyre kriminal e kanë kryer në Firence nga dhjetori 2019 deri në nëntor 2021. Kledjon Muçollari akuzohet si organizatori koordinator dhe drejtuesi. Ai merrej me sigurimin e kokainës në Holandë, hashashit dhe marijuanës në Spanjë dhe Shqipëri, duke mbajtur kontakte me furnizuesit e këtyre drogave dhe importimin e mëpasshëm në Itali, duke marrë pjesë gjithashtu në rishitjen e mëvonshme në Itali. Ervis Vangjeli akuzohet se ishte bashkëpunëtori përgjegjës për mbajtjen e kontakteve me klientët e kokainës në territorin italian, dhe ndiqte direktivat e Kledjon Muçollarit dhe duke kryer drejtpërdrejt dërgesat dhe transportin e mallrave.
PËRGJIMET
Në përgjimet ambientale të bërë nga policia italiane rezulton se krahu i djathtë i Muçollarit është Ervis Vangjeli, i cili kishte detyrat kryesore si kujdesi ndaj kli
entit, dhe koordinimi i grupit në mungesë të bosit. Edhe gjatë kohës që Muçollari ndodhej në Shqipëri për pushime, aktiviteti kriminale vijonte normalisht, pasi ai jepte udhëzime në celular dhe Vangjeli i zbatonte në terren. Në vetëm dy episode të fillim korrikut të vitit 2020 është provuar nga policia italiane përfshirja e këtyre personave në trafikun e narkotikëve. Gjatë korrikut të 2020- s Muçollari i dërgon një mesazh zanor “ushtarit” të tij, Ervis Vangjeli, duke i lënë porositë për klientët, por edhe për tu kujdesur për paratë. “Punën dërgoje fillimisht tek ai djali ku kemi edhe atë tjetrën “Ani Kuçin”, ose nëse do, çoje tek Ana, për tani, më pas e çon tek ai djali, ose si të duash vendose ti. Përse mendoj se nuk është mamaja e Anës, dhe nuk dua që të ndodhë ndonjë gjë. Megjithatë vendos ti. Pastaj më trego sa para janë. Ke marrë ndonjë lek mbrëmë?”, ky është mesazhi që Muçollari i dërgon Vangjelit. Sipas prokurorisë së Firences droga është transportuar me një makinë tip Hunday 130, dhe më pas është marrë nga një ‘ Opel’, shkëmbimi është kryer në 2 korrik të 2020. Gjithashtu sipas prokurorisë në përgjimin ambiental të bërë gjatë shkëmbimit të mallit, Mark Lisi i ka dërguar një mesazh zanor Ervis Vangjelit ku i thotë: “Puna shkoi mirë, paratë i morëm. Gjithçka në rregull”. Ndërkohë, ka pasur një tjetër komunikim mes Mark Lisit dhe Ervis Vangjelit, ku del sërish në skenë emri i Kledion Muçollarit, të cilit i referohen me nofkën “Bossi”. Komunikimi mes Markut dhe Vangjelit është deshifruar ku veçohet: “Ervis, ne presim shkërdhatat, kurse shefi është mbi varkë” ( i referohet Kledion Muçollarit, i cili ndodhet me pushime në Shqipëri).