Rritja e çmimit të patentave, autoshkollat bojkotojnë aktivitetin
Protestë para Drejtorisë së Patentave: Me aq lekë s'na vjen njeri, do shkojmë drejt falimentit. Një javë kohë, ose përshkallëzojmë protestat!
Në të parën ditë kur hynë në fuqi tarifat e reja për marrjen e lejedrejtimit autoshkollat zgjodhën të bojkotonin vendimin e Drejtorisë së Përgjithshme të Transportit Rrugor, duke mos u pajtuar me vendimin.
Sipas tyre, tarifat janë të papërballueshme dhe rrjedhimisht do çojnë në faliment, pasi qytetarët nuk janë të gatshëm t'i përballojnë. Të shoqëruara edhe nga forcat e policisë drejtuesit e autoshkollave janë nisur nga sheshi "Nënë Tereza" duke vazhduar përgjatë gjithë bulevardit "Deshmorët e Kombit" dhe më pas janë shpërndarë për të mos shkaktuar rëndim të trafikut. Realizimi i këtyre kërkesave sipas përfaqësuesve të shoqatës do të nxirrte biznesin e tyre nga rrënimi. Ata dënojnë mungesën e transparencës nga Drejtoria e Transportit Rrugor për rritjen e çmimit të patentave, ndërsa kërkojnë formalizimin e sektorit. Sipas tyre, duhet të miratohet çmimi fiskal për autoshkollat. "Me aq lekë sa i kanë rritur nuk na vjen njeri dhe ne detyrimisht do shkojmë drejt falimentit. Drejtoria qendrore duhet të rishikojë vendimin", shprehet një drejtues autoshkolle. "Mënjanimi dhe mosiforimimui në kohën e duhur nga Drejtoria e Shërbimit të Transportit Rrugor na ndikon në punën tonë të autoshkollave", thotë Agron Beja, kryetar i Shoqatës së Autoshkollave. Tarifat që ndryshojnë nga 5 shkurti janë ato për kartonin e patentës, që nga 3.500 lekë shtrenjtohet në 4.500 lekë dhe ritestimet për të cilat deri dje paguhej 400 lekë, ndërsa nga kjo e hënë bëhet 1 mijë lekë.
LETRA
Përmes një letre, ata shprehen se janë injoruar si grup interesi mbi ndryshimin e tarifave të shërbimit nga DPSHTRR- ja. Drejtuesit e shoqatës listojnë problemet dhe kërkojnë zgjidhje nga institucionet përgjegjëse. Ata kanë listuar një sërë kërkesash ( sipas tabelës përbri) dhe thonë se nëse nuk merren në konsideratë, janë të gatshëm të përshkallëzojnë indinjatën e tyre. Shoqata pretendon se ka pasur mënjanim dhe mosinformim në kohën e duhur si grup interesi që janë, para se vendimi të merrej nga institucionet përkatëse dhe se tarifat janë vendosur pa u diskutuar me ta. Kreu i shoqatës, Alim Lulaj e quajti ' tinëzare' vendimin e ministrisë për të rritur tarifat e patentës, ndërsa tha se koston do ta paguajnë qytetarët. "Ky ndryshim është bërë në mënyrë tinëzare, pa marrë asnjë mendim nga grupet e interesit. Na ka ardhur 2 ditë më parë lajmi për tarifat e reja. Këto janë në kurriz të qytetarëve. Është afërsisht 150 mijë lekë shtesë. Nuk afrohet qytetari, na cenon punën". Ai shtoi se nga sot një qytetar do të paguajë 15 mijë lekë, të reja, më shumë për t'u pajisur me leje drejtimi, ndaj vendimi i cenon dhe ata pasi në këtë mënyrë qytetarët do të stepen. Në Elbasan operojnë rreth 33 autoshkolla të cilët kanë të njëjtin shqetësim. Taksimi i profesioneve të lira, përfshirë dhe autoshkollat, duke filluar nga 1 janari ishte një tjetër çështje e kundërshtuar nga autoshkollat. Mësohet se bojkoti në të gjitha drejtoritë do të zhvillohet vetëm të hënën. Ata lanë një afat deri në fundjavë, dhe nëse nuk merren masa, do të ketë një protestë të shtunën para kryeministrisë ku do të vijnë autoshkollat e vendit dhe do të ketë një përshkallëzim të protestës së tyre. "Bojkoti i veprimtarisë sonë është sot dhe pastaj do t'u lëmë një afat deri të shtunën. Më pas, nëse nuk ka reagim, do të mblidhemi në një protestë të gjithë së bashku, në Tiranë. Do të ndalojmë makinat para selisë së Kryeministrisë. Të na trajtojnë të gjithë të barabartë. Mjaft me diskriminime sepse të njëjtin shërbim japim", thotë Tonin Gjinaj, sekretar i Përgjithshëm i Shoqatës së Autoshkollave.
Javën e kaluar, Drejtoria e Përgjithshme e Shërbimeve të Transportit Rrugor, ka bërë rishikim dhe indeksim për të gjitha shërbimet dhe tarifat që ofron. Në njoftimin e saj, Drejtoria tha se për disa kategori ka rritje të vlefshmërisë së lejeve të drejtimit, në të njëjtën kohë edhe rritje të kostos.
Protesta e djeshme u zhvillua në Drejtorinë e Përgjithshme të Shërbimeve të Transportit Rrugor ku u tha se me ndryshimet e fundit janë shkelur të gjitha të drejtat e tyre dhe nuk po zbatohet Kodi Rrugor, nuk po zbatohen VKM- të, sikurse edhe marrëveshjet e kryera ndër vite me Ministrinë e Infrastrukturës.