Përplasja, Rama: Kosova dhe Serbia të fokusohen te dialogu

"Seanca në KS ishte pa kuptim". Kreu i qeverisë, apel Kurtit dhe Vuciçiç: Të dyja shtetet të koordinohen me aleatët ndërkombëtarë

Në seancën e Këshillit të Sigurimit të Organizatës së Kombeve të Bashkuara, udhëheqësit e Kosovës dhe Serbisë shkëmbyen akuza të rënda.

Këto "përplasje" lidheshin me kufizimin e dinarit serb në Kosovë, çështje kaq e diskutuar së fundmi. Përmes një postimi në "X", reagoi dhe kryeministri Edi Rama. Ai e cilëson këtë seancë si të pakuptimtë, duke theksuar se dy shtetet duhet të fokusohen te dialogu dhe koordinimi me aleatët ndërkombëtarë. Në vlerësimin e kryeministrit Edi Rama debati për denarin serb në Këshillin e Sigurimit ishte i gjithi i pakuptimtë. Në platformën e tij "X" kreu i qeverisë shkruan se arena e Këshillit të Sigurimit në OKB nuk është vendi ky dy shtetet e pavarura, Kosova dhe Serbia, duhet të zgjidhin mosmarrëveshjet. "Ishte një seancë pa kuptim. Këshilli i Sigurimit i OKBsë është e qartë se nuk është vendi për asgjë që lidhet me Kosovën. Si dy vende sovrane që aspirojnë anëtarësimin në BE, Kosova dhe Serbia duhet të përqendrohen plotësisht në dialogun e lehtësuar nga BE- ja dhe të fokusohen në arritjen e marrëveshjeve për qarkullimin financiar, shërbimin postar, taksimin e dyfishtë dhe të gjitha çështjet e tjera që përfitojnë jetën e përditshme të njerëzve të zakonshëm, duke siguruar edhe një të ardhme paqësore për brezat e ardhshëm. Ndërsa qëndrojmë pranë Kosovës në parandalimin e çdo kërcënimi të jashtëm, Shqipëria do të vazhdojë t'i theksojë lidershipit kosovar rëndësinë e koordinimit të ngushtë me aleatët e saj kryesorë. Qëndrimi i palëkundur dhe i vazhdueshëm së bashku me ta tregon ndjenjën e vizionit dhe përgjegjësisë shtetërore, ndërkohë që çdo rast i qëndrimit të vetëm në rrugën e njohjes së plotë e zbeh pozitën e vendit në sferën publike të marrëdhënieve ndërkombëtare", shkruan Rama. Pas këtyre debateve në KS, ambasadorët e vendeve perëndimore kërkuan nga palët të përmbahen nga veprimet e njëanshme që mund të çojnë drejt përshkallëzimit të situatës. Edhe ministri i Jashtëm Igli Hasani reagoi në lidhje me seancën e mbajtur në Këshillin e Sigurimit, ku pati një përplasje mes kryeministrit të Kosovës, Albin Kurti dhe presidentit serb, Aleksandër Vuçiç. Ai siguroi se Shqipëria qëndron krah Kosovës në parandalimin e çdo kërcënimi të jashtëm dhe po ashtu Shqipëria do të vazhdojë të këshillojë liderët e Kosovës për rëndësinë e koordimit të ngushtë me aleatët e saj kryesorë. "Siç edhe Përfaqësuesja e Përhershme e SHBA- ve në Kombet e Bashkuara, Linda ThomasGreenfield, vuri dje në dukje në takimin e Këshillit të Sigurimit të OKB- së, se ka ' kërcënime akute ndaj sigurisë dhe stabilitetit që vijnë nga jashtë Kosovës'. Nuk mjafton vetëm të dënojmë Banjskën. Ne duhet të sigurohemi që kjo të mos ndodhë më kurrë. Ndërsa qëndrojmë në krah të Kosovës në parandalimin e çdo kërcënimi të jashtëm, Shqipëria do të vazhdojë të këshillojë liderët e Kosovës për rëndësinë e koordinimit të ngushtë me aleatët e saj kryesorë", tha ministri Hasani. Në seancën e Këshillit të Sigurimit të Organizatës së Kombeve të Bashkuara, udhëheqësit e Kosovës dhe Serbisë shkëmbyen dje akuza të rënda, përfshirë rreth zbatimit të vendimit për kufizimin e importit të dinarit serb në Kosovë, ndërkohë që ambasadorët e vendeve perëndimore kërkuan nga palët të përmbahen nga veprimet e njëanshme që mund të çojnë drejt përshkallëzimit të situatës.