Basha kundër Ramës për Kosovën: Ka nevojë për mbrojtje, jo për leksione
"Flet si perëndimor, vepron si lindor". Kështu e cilëson kryedemokrati deklaratën e kreut të qeverisë Edi Rama mbi mbledhjen e djeshme të Këshillit të Sigurisë së OKB, ku u diskutua mbi Kosovën. Kurti u vu "përballë" Vuçiç, në mesin e akuzave të ndërsjellta lidhur me vendimin e qeverisë së Kosovës për caktimin e euros si monedhë zyrtare. Ndërsa kreu i qeverisë, Edi Rama e cilësoi si të pakuptimtë zhvillimin e kësaj seance, duke nënvizuar se dy vende që aspirojnë anëtarësimin në BE, duhet të fokusohen tek konsensusi dhe dialogu. Lulzim Basha përmes një reagimi në rrjetin social "X", thotë se Kosova nuk ka nevojë për leksione demokracie nga një autokrat, duke iu referuar Ramës, por për mbështetje konkrete. "Aleatët strategjikë e trajtojnë sigurinë e Kosovës si çështje të sigurisë kombëtare, rajonale, europiane dhe euroatlantike. Vetëm Edi Rama nuk e konsideron të tillë. Aleatët strategjikë e trajtojnë korrupsionin e politikanëve dhe zyrtarëve të lartë në Shqipëri si cënim të sigurisë së tyre kombëtare. Vetëm Edi Rama nuk e konsideron çështje të sigurisë së vendit tonë. Kosova nuk ka nevojë për leksione demokracie nga një autokrat, por për mbështetje konkrete. Shqipëria nuk ka kërcënim më të madh ndaj sigurisë së saj kombëtare se korrupsioni që vret vende pune, varfëron shqiptarët dhe shkatërron besimin te institucionet dhe shteti. Kujtojmë që ditën e djeshme, gjatë seancës plenare, Partia Socialsite rrëzoi dy amendamentet e depozituara nga Lulzim Basha në Kuvend. Kryedemokrati kërkonte që një pjesë e buxhetit të shtetit shqiptar të shkonte si ndihmë ushtarake për Kosovën", deklaroi Basha.