"Shqipëria, partner kyç në Ballkan", DASH: Blinken, vizitë në Tiranë më 14 shkurt
Vizita në Shqipëri do të bëhet me qëllim të riafirmimit të lidhjeve të ngushta mes Uashingtonit dhe Tiranës
Sekretari Amerikan i Shtetit, Antony Blinken, do të vizitojë Shqipërinë javën e ardhshme. Kjo u konfirmua nga Departamenti Amerikan i Shtetit.
Vizita në Shqipëri do të bëhet me qëllim të riafirmimit të lidhjeve të ngushta Uashington- Tiranë, duke e cilësuar Shqipërinë si partner kyç dhe aleat i fortë në përkrahjen e sovranitetit të Ukrainës. Kjo vizitë në Shqipëri do të ndodhë para se Blinken të udhëtojë për në Gjermani, ku do të diskutohet për përkrahjen ndaj Ukrainës dhe përpjekjet për paqe në Lindjen e Mesme. DASH njoftoi se këto vizita të Blinken do të ndodhin nga data 14 deri më 17 shkurt. "Sekretari i Shtetit Antony J. Blinken do të udhëtojë në Tiranë, Shqipëri dhe Mynih, Gjermani, nga 14- 17 shkurt. Në Tiranë, Sekretari Blinken do të riafirmojë fuqinë e marrëdhënieve të Shteteve të Bashkuara me Shqipërinë, një partner kyç për stabilitetin në Ballkanin Perëndimor dhe një aleat i fortë në mbështetjen e sovranitetit dhe integritetit territorial të Ukrainës. Në Mynih, Sekretari Blinken do të marrë pjesë në Konferencën e Sigurisë, si pjesë e delegacionit të SHBA- ve të kryesuar nga zëvendëspresidentja Kamala Harris. Sekretari do të zhvillojë takime dypalëshe për të nënvizuar mbështetjen e qëndrueshme të Shteteve të Bashkuara për popullin e Ukrainës, për të vazhduar diskutimet me partnerët se si të arrihet paqe dhe siguri e qëndrueshme në Lindjen e Mesme dhe për të theksuar angazhimin tonë të palëkundur për sigurinë transatlantike. Sekretari Blinken do të bashkohet gjithashtu me partnerët ndërkombëtarë për një forum publik mbi multilateralizmin", - thuhet në njoftimin e DASH. Kjo do të jetë vizita e parë e Blinken në Shqipëri. Më herët, vendin tonë e kanë vizituar edhe paraardhësit e tij, James Baker, më 22 qershor 1991, Madeleine Albright, më 19 shkurt 2000, Colin Poëell në vitin e 2003 dhe Hillary Clinton në nëntor të 2012 dhe John Kerry, më 14 shkurt të vitit 2016, datë që përkon me vizitën e Blinken. Edhe vizita e Sekretarit Kerry atëherë në Tiranë i parapriu pjesëmarrjes së tij në Konferencën e Sigurisë në Mynih. Antony Blinken është i gjashti Sekretar Amerikan i Shtetit qe viziton Shqipërinë në 33 vite pluralizëm. E para vizitë është ajo e vitit 1991 e Sekretarit James Baker, i cili sipas raportimeve të mediave amerikane të kohës u prit nga 300 mijë shqiptare në sheshin "Skënderbej" në Tiranë. Në fjalimin e tij, sekretari James Baker tha se: "Liria funksionon" dhe i nxiti shqiptarët të vazhdonin përpara me rrugën drejt demokracisë. Pasi foli me njerëzit në sheshin qendror të Tiranës, sekretari Baker u takua me kryeministrin reformator Ylli Bufi, me Presidentin Ramiz Alia, si dhe me udhëheqës të grupeve të sapoformuara opozitare. Baker e bëri të qartë se nuk kishte ardhur me një ' plan Marshall' për Shqipërinë edhe vizita e tij u shoqërua me një paketë ndihmash prej 6 milionë dollarësh, qumësht pluhur, mjekime dhe pajisje mjekësore. Kjo ka qenë në fakt asistenca e parë e Shteteve të Bashkuara për Shqipërinë. Nëntë vite pas vizitës se James Baker, në vitin 2000, Shqipërinë e vizitoi Madeleine Albright. "Ndërsa shohim përpara drejt një të ardhmeje të re dhe më të ndritshme për Evropën Juglindore, ne presim që Shqipëria të ndihmojë në udhëheqjen e rrugës", - tha sekretarja amerikane Albright në Tiranë, ku mbajti edhe një fjalim në Kuvendin e Shqipërisë. Në vitin 2003 do të ishte radha e Sekretarit Amerikan Colin Pawell, i cili e cilësoi vizitën si një "një akt miqësie". Atë ditë në Tiranë ishin edhe dy ministrat e Jashtëm të Maqedonisë dhe Kroacisë, pasi qëllimi i vizitës zyrtare i krahut të djathtë të presidentit George Bush në Shqipëri ishte firmosja e kartës "Adriatik 3", një angazhim rajonal i Shqipërisë, Maqedonisë dhe Kroacisë në përshpejtimin e anëtarësimit në NATO. "Sekretari i Shtetit Antony J. Blinken do të udhëtojë në Tiranë, Shqipëri dhe Mynih, Gjermani, nga 14- 17 shkurt. Në Tiranë, Sekretari Blinken do të riafirmojë fuqinë e marrëdhënieve të Shteteve të Bashkuara me Shqipërinë, një partner kyç për stabilitetin në Ballkanin Perëndimor dhe një aleat i fortë në mbështetjen e sovranitetit dhe integritetit territorial të Ukrainës".