RENEA shoqëron 3 persona, mes tyre Shkëlzen Xhenjen, i kërkuar për vrasjen e Ismet Çekores
Ngjarja e dy netëve më parë kur ndaj një burri u qëlluar me breshëri kallashnikovi ka kthyer panikun në Shkodër. Policia shpejt doli ' jashtë loje' në lidhje me autorët, ndërkohë që për fatin e tij, shënjestra e asaj prite, Selami Brahimi, ka mundur të shpëtojë mrekullisht. Menjëherë policia e Shkodrës ka kërkuar ndihmën e RENEAs për të ndërhyrë për shkak se Shkodra është një ndër rrethet që mbart më shumë krim të sofistikuar. Forcat speciale ndërhynë dhe shoqëruan tre persona, mes tyre edhe një të shumë kërkuar. Bëhet fjalë për Shkëlzen Xhenjen, një eksponent të njohur të krimit në Shkodër, i dalë në disa episode të tri viteve të fundit, sa herë Shkodra trazohej. Policia lokale bëri me dije dje se: "Operacioni rezultoi me lokalizimin në banesën ku fshihej, në fshatin Kuç, kapjen dhe neutralizimin e shtetasit të shpallur në kërkim Sh. Xh.. 32- vjeçar, shtetas me rrezikshmëri shumë të lartë shoqërore, për shkak të akuzave/ dënimeve për një shumëllojshmëri veprash penale"! mirëpo në lidhje me priten e organizuar kundër Brahimit policia ende nuk ka një version, ndonëse ka arritur të dokumentojë dëshminë e të plagosurit. Po ashtu janë marrë edhe dëshmi okulare nga vendi i ngjarjes, janë hapur edhe kamerat në vendngjarje dhe në një sërë rrugësh nga ku pretendohet se mund të kenë lëvizur atentatorët, ndërkohë që hetimet janë shtrirë tek lidhjet e shënjestrës. Ka dyshime se gjithçka ka ardhur nga një miqësi që Brahimi ka me një person nga familja e Liçëve, krahu kundërshtar i Bajrajve, të cilët u goditën në kuadër të operacionit Metamorfoza. Po ashtu bëhet me dije se Xhenja, i arrestuari i shumëkërkuar, rezulton të jetë në anën e Bajrajve bashkë me një tjetër person të cilin Policia pak ditë më parë i hyri në shtëpi dhe u detyrua t` i vriste qentë, pasi personi mundi të largohej pa rënë në duart e tyre. Bëhet fjalë për Elion Haton të riun që akuzohet si njëri prej personave të bindur të Ervis Martinajt e njëkohësisht si personi që ka marrë pjesë të masakra në "Don Bosko", ku për fatin e keq të saj humbi jetën banakierja e lokalit në pronësi të familjes së Fatjon Muratit. Në atë pritë u plagosen edhe 6 persona të tjerë, por policia nuk mundi të arrestonte asnjë prej atentatorëve.