SPAK mbyll hetimet për avokatin Alban Bengasi, e akuzon për "dhunë në familje"
Do të paguante 120 mijë euro për vrasjen e ish- gruas ushtarët e Dumanit Prokuroria çon në GJKKO dosjen e një prej akteve më monstruoze të kryera nga grupi i vrasësve me pagesë që i zunë pritë Blertës
Banda e killerave me pagesë që u zbulua pas plagosjes së Nuredin Dumanit dhe pas dëshmisë së dhënë prej tij dhe Henrik Hoxhës, dëshmoi se merrte porosi edhe për vrasje grash.
madje porositësi ishte pikërisht burri i cili i kishte premtuar atentatorit të gruas së tij shumën prej 120 mijë eurosh. Porositësi, sipas Nuredin Dumanit, ishte Alban Bengasi, ndërsa personi që mori përsipër aktin për të shpërfytyruar Blerta Bengasin ishte ushtari i Dumanit, Elio Bitri. Ndërmjetës për të realizuar pritën ndaj bashkëshortes së avokatit ishte zgjedhur Festim Qoli, një tjetër personazh i mënxyrës gjakësore të më shumë se një dekade vrasjesh në vendin tonë. Prokuroria e Posaçme pasi mori dëshmitë e Henrik Hoxhës dhe të Nuredin Dumanit, e çoi në pranga avokatin- porositës të krimit të rëndë, ndërkohë që ditën e djeshme ka bërë me dije se ka mbyllur hetimet duke e çuar dosjen e Bengasit në Gjykatë! SPAK thotë se ish- avokati akuzohet për ' dhunë në familje', ndonëse dhunimi kushtonte 120 mijë euro. Në fakt pas asaj prite barbare që iu bë bashkëshortes së avokatit, u mësua se ajo qëndroi në spital me pavetëdije për më shumë se një jave, por sërish akuza ndaj Bengasit ka mbetur dhunë në familje.
NJOFTIMI I SPAK
Prokuroria e Posaçme Kundër Korrupsionit dhe Krimit të Organizuar, përfundoi hetimet për procedimin penal nr. 75/ 5, të vitit 2024, dhe përcolli në Gjykatën e Posaçme të Shkallës së Parë Kundër Korrupsionit dhe Krimit të Organizuar, kërkesën me objekt "Dërgimin për gjykim të procedimit penal nr. 75/ 5", në ngarkim të të pandehurit Alban Bengasi, akuzuar për veprat penale "Dhuna në familje", në dëm të shtetases Blerta Bengasi ( Ruçi), kryer në formën e veçantë të bashkëpunimit, atë të grupit të strukturuar kriminal, "Grupi i strukturuar kriminal", dhe "Kryerja e veprave penale nga grupi i strukturuar kriminal dhe organizata kriminale", parashikuar nga nenet 130/ a/ 1, 28/ 4, 333/ a dhe 334 të Kodit Penal. Rasti i referohet ngjarjes së ndodhur më datë 30.01.2020, ku rreth orës 11: 15 të paradites, në Rrugën "Mihal Grameno", Tiranë, në momentin kur shtetasja Blerta Bengasi ( Ruçi), ka hyrë në automjetin e saj me targë AA 282 DI, është dhunuar nga një person, i cili e ka goditur shumë herë me grushte në pjesën e fytyrës dhe mbrapa koke, duke i shkaktuar dëmtime në pjesën e hundës, dhe të gojës tek dhëmbët. Më pas, e dëmtuara Blerta Ruçi, ka njoftuar policinë lidhur me ngjarjen e ndodhur. Hetimet e kryera nga Prokuroria e Posaçme, bënë të mundur identifikimin e personave që kanë bashkëpunuar për dhunën e ushtruar ndaj shtetases Blerta Ruçi, si dhe rolin e secilit person të përfshirë.
Konkretisht, i pandehuri Alban Bengasi ( ish bashkëshorti i të dëmtuarës Blerta Ruçi), për shkak të konflikteve familjare, ka qenë porositësi i aktit të dhunës, i bashkëhetuari Festim Qoli, është personi që ja ka ofruar si "punë", të pandehurit Nuredin Dumani, dhe më pas ka mundësuar takimin ndërmjet të pandehurve Alban Bengasi dhe Nuredin
Dumani. I pandehuri Nuredin Dumani, është personi që ka kryer ndjekjen e shtetases Blerta Bengasi, për të mësuar itinerarin e lëvizjeve dhe përditshmërinë e saj, dhe i bashkëhetuari Eljo Bitri është ekzekutori, personi i cili ka goditur shtetasen Blerta Bengasi, ditën e ngjarjes.
Nga hetimet është evidentuar përfshirja në krim edhe e një personi tjetër, shok i të bashkëhetuarit Elio Bitri, i paidentifikuar deri më tani, i cili shfaqet në rolin e ndihmësit pasi ka qenë drejtuesi i mjetit me të cilin është larguar i bashkëhetuari Eljo Bitri nga vendi i ngjarjes. Këta shtetas kanë bashkëvepruar në bashkëpunim në formën e grupit të strukturuar kriminal, duke e shtrirë në kohë dhe vende aktivitetin e ndjekjes së të dëmtuarës nga vepra penale, si dhe duke pasur një ndarje të qartë rolesh në kryerjen e veprës penale.
DËSHMIA E NUREDIN DUMANIT
Nuredin Dumani, në dëshminë e dhënë për hetuesit, ka rrëfyer se si avokati e pagoi për t'i vrarë bashkëshorten e tij, pasi dyshonte se ajo e kishte tradhtuar me shokun e ngushtë. Blerta Ruçi, nëna e dy fëmijëve të Alban Bengasi, u dhunua brenda në Janar të vitit 2020 teksa qëndronte në automjetin e saj, por pavarësisht akuzave të saj se ngjarja ishte porositur nga i shoqi, ngjarja u zbardh vetëm pas prangosjes së Nuredin Dumanit, rreth dy vite më vonë. "Një person u afrua dhe qëlloi me grushte për disa minuta. Sipas prokurorisë ajo humbi vetëdijen për të paktën 9 ditë megjithatë arriti t'i tregojë hetuesve identikitin e autorit duke thënë se ai ishte një person i moshës 28- 33 vjeç, rreth 178 cm i gjatë, ezmer, flokë të errët të shkurtër", rrëfeu ajo. I penduari i drejtësisë Nuredin Dumani u ka thënë hetuesve se porositësi i këtij sulmi ishte pikërisht bashkëshorti i saj, Alban Bengasi me të cilin në atë kohë ajo ishte në proces divorci. Sipas Dumanit, Bengasi e donte të vdekur bashkëshorten e tij pasi dyshonte se ajo e kishte tradhtuar me shokun e tij të ngushtë. Nuredin Dumani i ka thënë grupit hetimor se personi që e ka kontaktuar fillimisht me avokatin ka qenë Festim Qoli, një nga 9 personat e arrestuar në kuadër të operacionit "Plumbi i Artë". Sipas tij, Festim Qoli kërkonte t'i bënte nder Dumanit sepse pretendonte që avokati Alban Bengasi do e ndihmonte të merrte 500 mijë euro dëmshpërblim nga shteti për shkak se tërmeti i kishte dëmtuar kompleksin në pronësi të tij. Ndër të tjera ai tregon se avokati nuk i ka dhënë paratë sepse donte që ajo të ishte sa më e dëmtuar. Ai shprehet se pasi nuk kanë rënë dakord, avokati i ka thënë se do ia kërkonte këtë nder të Gjergj Cukalit ( i konsideruar si i forti i Myslym Shyrit) i cili sipas tij ishte në borxh me të sepse e kishte nxjerrë njëherë nga burgu. "Më ofroi çmimin e 120.000 eurove për ta mbaruar si punë. I thashë është shumë pak për një femër. Më thanë nëse nuk e bën ti do ti them Gjegj Cukalit ta bëj pasi më ka borxh për një nder pasi e kam nxjerr nga burgu. I thashë vazhdo me Gjergjin unë se marr përsipër këtë gjë", - tha ai në dëshminë e tij.