Deklaratat e Ahmetajt, Basha: Të zhytur të gjithë bashkë në korrupsion!

Në Dimal, ku zhvilloi një takim me mbështetësit e Partisë Demokratike, Lulzim Basha përsëriti mbështetjen ndaj Prokurorisë së Posaçme Kundër Korrupsionit dhe Krimit të Organizuar. Ai theksoi se fundi i pandëshkueshmërisë politike është fillimi i një Shqipërie europiane. “Pa diskutim, pritshmëritë ndaj SPAK janë të larta. Unë e di që pritshmëritë e shqiptarëve janë shumë më të larta sesa ç’është bërë deri më tani dhe shpresoj dhe jam i bindur që këtë pritshmëri e njohin edhe prokurorët, hetuesit dhe gjyqtarët me integritet të SPAK. Detyra jonë është ta mbështesim me të gjitha format dhe mënyrat politike të dhënies fund të pandëshkueshmërisë. Dhe kjo është arsyeja se pse PD është sot e vetmja parti politike në Shqipëri që e thotë me zë të lartë, me ballin lartë, hapur, që mbështet pa kushte punën e SPAK”, - deklaroi Basha. Kreu i PD- së komentoi edhe deklaratat e ish- zëvendëskryeministrit Arben

Ahmetaj për Edi Ramën dhe Erion Veliajn. “Meraku që kanë është një ofensivë ndaj SPAK për ta kërcënuar, intimiduar. Kjo është e kuptueshme se s’kanë kaluar as 10 ditë që kur zv. kryeministri tregoi me gisht Ramën e Veliajn si bashkëpronarë dhe përfitues të skemës më korruptive, afera e inceneratorëve. Kjo tregoi që janë të gjithë bashkë të zhytur në korrupsion. Kjo tregon pse i janë përveshur SPAK- ut dhe drejtësisë se kanë frikë. Deri para ca kohësh i kishin në xhep prokurorë e gjyqtarë, hetimet përfundon në asgjë apo nuk çelshin fare. Frika e të paprekshmeve nga drejtësia është edhe produkti i parë i reformës në drejtësi”, - u shpreh ai. Lulzim Basha bëri me dije se Partia Demokratike ka gati një program ekonomik, social e politik të hartuar nga ekspertë vendës dhe të huaj. Ai shprehet i bindur për fitore në zgjedhjet parlamentare të vitit të ardhshëm.