Belind Këlliçi: Ferdinand Tarazhi, drejtor i inceneratorit të Tiranës!
Belind Këlliçi ka denoncuar dje se personi që dikur ka qenë i punësuar në inceneratorin e Tiranës, dje është emëruar në krye të Agjencisë së Pasurive të Sekuestruara. Me anë të një deklarate, Këlliçi shprehet se Ferdinand Tarazhi është një ish- drejtor në Ministrinë e Brendshme, i kallëzuar në SPAK në vitin 2021 nga Kontrolli i Lartë i Shtetit për abuzim me procedurat tenderuese për rikonstruksionet e komisariateve. Po ashtu, sipas Këlliçit, në qershor të vitit 2023, Tarazhi punësohet si drejtor i Shërbimeve Operacionale në landfillin e Sharrës nga “Integrated Energy” BV SPV.
“Ky veprim skandaloz duhet të ngre në këmbë menjëherë Altin Dumanin dhe strukturën e përgjumur të SPAK, pasi me bekimin e tyre po vazhdojnë të vidhen qindra miliona euro të taksapaguesve shqiptarë”, shprehet anëtari i kryesisë së PD, Belind Këlliçi.
DEKLARATA E PLOTË:
Jam në këtë komunikim me ju për t’ju bërë me dije se ditën e sotme ( dje) Taulant Balla ka emëruar në krye të Agjencisë së Pasurive të Sekuestruara, Ferdinand Tarazhin. Tarazhi është një ish- drejtor në Ministrinë e Brendshme, i kallëzuar në SPAK në vitin 2021 nga Kontrolli i Lartë i Shtetit për abuzim me procedurat tenderuese për rikonstruksionet e komisariateve. Hetim të cilit nuk i dihet akoma fati. Deri këtu në fakt nuk ka asgjë e re për standardin e Rilindjes. Në qershor të vitit 2023, ky personazh punësohet si Drejtor i Shërbimeve Operacionale në landfillin e Sharrës nga ‘ Integrated Energy’ BV SPV, si njeriu i besuar i baxhanakut të Mirel Mërtirit, Mark Jaka për të vazhduar biznesin fitimprurës të dherave.
Biznes i cili ka gjeneruar dhjetëra miliona euro të cilat dhe sot fshihen kesh siç thotë SPAK, ose metra katrorë ndërtim të shpërndara në të gjithë kullat e Tiranës, të cilat sigurisht kjo strukturë refuzon t’i shohë. Ky veprim fakton fare qartë se Erion Veliaj nuk ka ndërmend të heq dorë nga biznesi i tij duke i bërë karshillëk strukturës speciale, e cila tashmë të gjitha informacionet se çfarë ndodh në atë vend krimi do i marrë nga pronari faktik, emrin e të cilit SPAK nuk guxon ta përmendë, e jo më ta hetojë. Erion Veliaj, pronari faktik i inceneratorit të Tiranës, pohuar ky fakt dhe nga ish zv. kryeministri Arben Ahmetaj në intervistën e tij, pasi miratoi 12 milionë euro në buxhet për këtë biznes, sot emëron të besuarin e tij, në mënyrë që të sigurojë transferimin e parave i pashqetësuar.
Ky veprim skandaloz duhet të ngre në këmbë menjëherë Altin Dumanin dhe strukturën e përgjumur të SPAK, pasi me bekimin e tyre po vazhdojnë të vidhen qindra miliona euro të taksapaguesve shqiptarë.
U bë tashmë 6 muaj që çdo ditë nga kjo foltore, denoncoj me fakte të pakontestueshme dhe dokumente autentike përfshirjen e drejtpërdrejtë në këtë sipërmarrje korruptive të kryetarit të Bashkisë Tiranë, i cili si pronar faktik tashmë vijon të garantojë jo vetëm pagesat e plota, por dhe administrimin shtetëror të biznesit të tij. Ky është një rast i paprecedent karshillëku dhe tallje ndaj organeve të reja të drejtësisë, i cili fakton përtej çdo dyshimi bashkëpunimin e ngushtë SPAK– Veliaj. Për sa kohë SPAK nuk vepron mbi pronarin faktik të inceneratorit të Tiranës, nuk ka më asnjë dyshim se drejtësia e re, ka lindur e vdekur. Le të jetë kjo një arsye më shumë për të gjithë kryeqytetasit, që më datën 20 shkurt, të derdhen në bulevardin “Dëshmorët e Kombit” për t’i dhënë fund regjimit më korruptiv që ka njohur Europa këto 3 dekadat e fundit. O sot, o kurrë!
Në qershor të vitit 2023, ky personazh punësohet si drejtor i Shërbimeve Operacionale në landfillin e Sharrës nga ‘ Integrated Energy BV SPV’, si njeriu i besuar”, - deklaroi Këlliçi për mediat, duke e akuzuar Tarazhin për lidhje me Mirel Mërtirin dhe gjendjen e tij në kushtet e konfliktit të interesit.