Blinken të enjten në Tiranë, takohet me Ramën dhe Dumanin Për SHBA- të, reforma në drejtësi dhe antikorrupsioni janë prioritet
Ditën e enjte do të vizitojë Tiranën Sekretari amerikan i Shtetit, Antony Blinken. Ai pritet të mbërrijë në aeroportin e Rinasit mesditën e së enjtes, ndërsa mësohet se pritja do të bëhet nga ministri i Jashtëm, Igli Hasani. Ndalesa e parë e sekretarit Blinken mësohet se do të jetë në selinë diplomatike amerikane. Më pas është parashikuar takimi me kryeministrin Edi Rama. Zyrtari amerikan do të takohet me kryeministrin Rama dhe kreun e SPAK, Dumani. Të enjten e 15 shkurtit për herë të parë do të vizitojë Shqipërinë, Sekretari amerikan i Shtetit, Antony Blinken. Një ditë përpara se të marrë pjesë në konferencën e sigurisë në Mynih, zyrtari amerikan do të ndalet për disa orë në Tiranë, për t’u larguar po atë ditë nga vendi ynë. Në një kofidencialitet të plotë për shkak të sigurisë, mësohet se
Blinken në kryeqytetin shqiptar do të takohet me kryeministrin Edi Rama, me të cilin më pas mund të ketë një konferencë për shtyp. Gjithashtu, Sekretari amerikan i Shtetit do të takojë dhe kreun e SPAK, Altin Dumanin, që deri më tani është lexuar si një mbështetje e SHBA në luftën ndaj korrupsionit në nivele të larta dhe krimit të organizuar. Për Shtetet e Bashkuara të
Amerikës, reforma në drejtësi dhe lufta kundër korrupsionit është prioritet, e për këtë një takim Sekretari amerikan i Shtetit do të zhvillojë një takim edhe me drejtuesin e SPAK, Altin Dumani. Gjatë qëndrimit në Tiranë sekretari Blinken pritet të takohet edhe me stafin e ambasadës amerikane. Ardhja në Tiranë për disa orë e Antony Blinken do të shoqërohet edhe me masa të rrepta sigurie nga Policia e Shtetit, ku pritet të ketë disa kufizime në segmentet nga aeroporti i Rinasit në drejtim të kryeqytetit, por edhe brenda Tiranës, aty ku Blinken do të lëvizë për të zhvilluar takimet. Antony Blinken do të bëhet Sekretari i gjashtë amerikan i Shtetit që vjen në Shqipëri për një vizitë zyrtare. Pas vizitës në Tiranë, Blinken do të shkojë drejt Mynihut, ku do të marrë pjesë në konferencën e sigurisë.