PS u tërhoq pa shpjegime, bastet kthehen sot në Kuvend
Propozimi, Braçe: Licencën për organizatorët ta japë SPAK- u! Për taksimin duhet sistem shtrëngues, siç aplikohet për të ardhurat e deputetëve
Në Kuvend rikthehet sot për votim projektligji “Për lojërat e fatit”, draft i tërhequr nga vetë socialistët në seancën e 8 shkurtit.
Mazhoranca e tërhoqi pa shpjegime ligjin për rikthimin e basteve dhe nuk përcaktoi një datë të re për votim. Në seancën e 15 shkurtit është parashikuar edhe një interpelancë me Kryeministrin Edi Rama e kërkuar nga disa deputetë të PD për çështjen Ahmetaj dhe akuzat për incerenatorët. Rend që pritet të mos realizohet nisur nga takimet e kreu të ekzekutivit në kuadër të vizitës së Sekretarit Antony Blinken në Tiranë. Për votim shkojnë edhe projektligj për festat zyrtare, organika e INSTAT, si dhe miratimi i strukturës dhe pagat për punonjësit e KQZ. Opozita shkaktoi kaos me vezë dhe miell jashtë dhe brenda dyerve të sallës në 8 shkurt. Për pasojë, Edi Paloka u përjashtua me 40 ditë për djegien e librit të rregullores dhe 20 ditë Petrit Dodën që u përplas me Gardën. Pak ditë më parë hapja e basteve ‘ online’ shkaktoi sërish debate në Komisionin e Ekonomisë, kur deputeti Erion Braçe kërkoi filtra më të fortë kontrolli për ata që do të marrin licencat. Braçe tha se bastet mbeten në duart e krimit ndërsa propozoi edhe mundësinë që fjalën e fundit për miratimin ta japë
Prokuroria e Posaçme. Miratimin përfundimtar për dhënien e licencës për organizimin e lojërave të fatit për deputetin socialist Erion Braçe mund ta japë SPAK. “Po sikur këtë sistem shtrëngues të verifikimit të të ardhurave për këta që do të organizojnë lojërat e fatit ka ndonjë problem? Ky sistemi i kontrollit për çdo qeveritar, deputet e kështu me radhë ka ndonjë problem? A ka
mundësi që miratimin përfundimtar ta japë SPAK. Më ka rënë në vesh që miratimin e fundit të kazinove e jep FBI”, - tha Braçe. Në mbledhjen e Komisionit të Ekonomisë për projektligjin për rikthimin e basteve ‘ online’, Braçe ripërsëriti qëndrimin e tij nuk garantohet
ato nuk do të bien sërish në dorën e krimit të organizuar. “Problemet kanë qenë kriminalizimi i këtij sektori dhe prezenca e krimit të organizuar në këtë sektor. Ky ishte shqetësimi im i parë, me çkriminalizimin e këtij sektori. Ishte dhe vazhdon të jetë. Me aq sa ka sjellë ligji unë nuk mendoj se janë të mjaftueshme që ky sektor të çkriminalizohet”, - deklaroi Braçe. Deputeti socialist kërkoi edhe një herë tatim më të madh për organizatorët e lojërave të fatit, ndërsa tha se propozimin do ta paraqesë me shkrim. “Që ne të marrim një çdo 100 lek i luajtur vetëm 1.5 lekë, unë mendoj se nga e gjithë kjo sipërmarrje e madhe për t’i legalizuar është thuajse e papërfillshme. Mbi të gjitha që ne duhet të pranojmë që në çdo 100 lekë ata shpërndajnë 90 lekë për çdo lojtar, që këta vrasin njëritjetrin dhe grabitur njëritjetrin për 4.3 lekë në 100 lekë duhet të jesh i çmendur që ta besosh. Unë kam bërë një propozim nga qeveria nëse është pro apo kundër para se ta paraqes me shkrim kur të votohet”, - u shpreh Braçe. Qëndrimin e qeverisë dhe ekspertëve se lojtari nuk duhet të taksohet, Braçe e komentoi kështu: “Është një analist i famshëm shumë, që gjithë ditën luajnë e kuqe e zeze, kuqe e zezë dhe del pastaj në darkë dhe bën analiza politike. Dhe të mos paguajë ai asnjë lloj fitimi. Ndërkohë që brenda asaj studios ka njerëz profesionistë të lirë që do të paguajnë. Kjo s’ka më asnjë lloj kuptimi”,- tha Braçe. Ndryshimet në projektligjin për lojërat e fatit parashikojnë rikthimin e basteve sportive vetëm ‘ online’, dhënien e së drejtës për ta ushtruar këtë aktivitet vetëm për 10 operatorë dhe përzgjedhja e tyre nëpërmjet një komisioni të veçantë.