Seancë dëgjimore për “Zgjedhoren”, Komisioni i Posaçëm mblidhet “online”

Nën drejtimin e 2 bashkëkryetarëve, Damian Gjiknuri dhe Enkelejd Alibeaj, u mblodh dje “online” Komisioni i Posaçëm i Reformës Zgjedhore. Në këtë seancë dëgjimore, të gjitha partitë politike janë të ftuara për të dhënë propozimet e tyre. Në total kanë qenë 9 parti politike që kanë shfaqur interes për të marrë pjesë në seancë, ku edhe po shprehin qëndrimet e tyre. Por në linjë nuk ishin kreu i PAA- së, Agron Duka, kreu i PBDNJ- së, Vangjel Dule dhe kryerepublikani Fatmir Mediu, të cilët e bojkotuan seancën e djeshme. I vetmi që mori pjesë nga aleatët tradicional të së djathtës ishte Dashamir Shehi, i cili propozoi një sistem proporcional për reformën zgjedhore, ndërsa u shpreh pro hapjes së listave deri në fund. Gjatë fjalës së tij nga mbledhja e Reformës Zgjedhore, Shehi tha se është pro votimit dhe numërimit elektronik. Më herët, Komisioni i Reformës Zgjedhore zhvilloi një seancë me shoqërinë civile, ku u dëgjuan propozimet e tyre për ndryshimet e nevojshme në Kodin Zgjedhor, në përputhje me rekomandimet e OSBE- ODIHR. Por “revoltë” ka shfaqur së fundmi edhe diaspora. Në një letër drejtuar dy bashkëkryetarëve Enkelejd Alibeajt dhe Damian Gjiknurit, grupi i punës për Votën e Diasporës, Këshilli Koordinues i Diasporës për Shqipërinë e Lirë kanë shprehur shqetësimin dhe zhgënjimin e tyre për mungesën e ftesës për pjesëmarrje në komision. Ndërkohë, bashkëkryetari Gjiknuri tha se për diasporën do të ketë një seancë të posaçme në komision, ku edhe pritet që të diskutohet një nga çështjet më të “nxehta” ajo e të drejtës së votës së tyre.