Të pamëshirshëm, si e zhvatën biznesmenin dhe i rrahën gruan
Arrestohet i moshuari, krijonte bazat për bandën e grabitësve shqiptarë Italiani, 75 vjeç, kishte në “punë” një grup prej 10 personash, thotë prokuroria italiane, të gjithë shtetas shqiptarë
Gjurmimi i disa grabitësish në zonat e pasura të veriut të Italisë ka çuar në arrestimin e një të moshuari italian, i cili dyshohet se bashkëpunoi me një bandë shqiptarësh që kryenin grabitje vilash.
Hetimi ka nisur në bazë dyshimi, teksa shqiptarët që kryenin grabitjet zhdukeshin bashkë me mjetet, të cilat sipas hetimit vendas, fshiheshin nga i moshuari italian. Kështu një 75- vjeçar, banues në Rozzano, u arrestua nga karabinierët e Brescias me akuzën e pajisjes me logjistikë të një bande shqiptarësh të dedikuar për vjedhje makinash dhe grabitje vilash. Ata kryen të paktën 16 sulme në provincat e Brescias, Bergamos, Milanos, Monzas, Brianzas, Pavias, Piacenzas dhe Reggio Emilias dhe të paktën 4 vjedhje makinash. Së bashku me 75- vjeçarin, në hetim përfunduan edhe 10 kriminelë të tjerë, të gjithë me kombësi shqiptare. Gjashtë janë arrestuar, ndërsa 4 janë aktualisht të pagjetur. Ata akuzohen, për arsye të ndryshme dhe në bashkëpunim, për vjedhje banesash dhe makinash dhe një sërë veprash të tjera penale. Aktualisht 75- vjeçari, D. F, ndodhet në arrest shtëpiak, duke pasur parasysh edhe moshën e tij. Ai nuk akuzohet se ka marrë pjesë në vjedhje dhe grabitje, por se ishte kujdesur për gjetjen e garazheve në të cilat do të fshiheshin makinat e vjedhura nga grupi i shqiptarëve. Në dosjen e saj prokuroria italiane thotë se këto mjete përdoreshin nga hajdutët për t’u arratisur gjatë grabitjeve.
GRABITJE ME DHUNË
Anëtarët e bandës u identifikuan pas grabitjes me dhunë të kryer në Iseo, ndaj biznesmenit 59- vjeçar Roberto Botti nga Brescia. Më 11 janar 2023, 3 persona me fytyrë të mbuluar e kanë pritur te dera e shtëpisë dhe duke e kërcënuar me armë e kanë detyruar të zbresë nga makina. Ata e goditën me tytën e armës në kokë dhe i dhunuan gruan, duke e detyruar të hapte fillimisht derën dhe më pas kasafortën për të marrë paratë dhe xhevahiret që kishte. Më pas ata u larguan me dy makina të vjedhura, mjete që më vonë rezultuan se ishin strehuar pikërisht nga i moshuari italian që u identifikua dhe u prangos nga policia italiane.
HETIMET
Hetimet e para nga policia bënë të mundur të lokalizonin një nga makinat e përdorura për arratisjen, një BMË seri 3 e pajisur me GPS. Ajo ndodhej në një garazh në Rozzano në dispozicion të 75vjeçarit. Që nga ai moment, me përgjime mjedisore dhe telefonike dhe me analizat e kamerave të shumta, karabinierët arritën t’i atribuojnë bandës edhe 16 sulme të tjera të ndodhura midis shtatorit 2022 dhe prillit 2023. Kontrollet e garazheve dhe dhomave në dispozicion të anëtarëve të bandës kanë bërë të mundur gjetjen e levave, çekiçëve, dhe materialeve të tjera të përdorura gjatë vjedhjeve. Gjithashtu, janë sekuestruar 4 makina të mëdha dhe 4 pistoleta të vjedhura si dhe një pjesë të mallit të vjedhur.