Shpronësimet, emrat dhe masa e kompensimit për 365 pronarë në Tiranë

Mbi 866 milionë lekë për shpërblimin e qindra pronarëve që cenohen nga projekti. Agjencia: Dokumentacioni të dorëzohet brenda 15 ditësh

Edhe 365 pronarë të tjerë në zonën ku po ndërtohet aksi "Thumanë- Vorë- Kashar" do të dëmshpërblehen për pronën që cenohet nga projekti i qeverisë. Agjencia për Shpronësim ka hartuar listën e radhës me emrat e përfituesve dhe masën e shpërblimit për secilin pronar të tokës truall dhe ndërtesave.

Ky është vlerësimi i ri që iu është bërë këtyre pronave pas kontestimeve e protestave të vazhdueshme në më shumë se një vit nga banorët, me pretendimin e një dëmshpërblimi në vlera qesharake. "Me anë të këtij publikimi kërkojmë të vëmë në dijeni personat e prekur nga ky shpronësim, për pasuritë e paluajtshme, pronë private, të cilët do të kompensohen sipas vlerësimit paraprak të llogaritur për pasuritë e llojit "arë + truall", sipas VKM- së nr. 89, datë 3.2.2016, "Për miratimin e hartës së vlerës së tokës në Republikën e Shqipërisë", ndërsa vlerësimi i pasurisë së llojit "ndërtesë" është llogaritur bazuar në vendimin nr. 138, datë 23.2.2000, "Për kriteret teknike të vlerësimit dhe të përllogaritjes së masës së shpërblimit të pasurive, pronë private, që shpronësohen, të pasurive që zhvlerësohen dhe të të drejtave të personave të tretë, për interes publik, për pasuritë e llojit "ndërtesë banimi ose jo banimi", i ndryshuar", citohet në vendimin e ASHSH. Vlera totale paraprake e shpronësimit është 866,853,943.53 lekë. Pas botimit në fletoren zyrtare ftohen personat që kanë emrin në tabelë si dhe ata që mendojnë se preken, por nuk kanë emrin në listë të paraqesin dokumentacionin me pretendimet e tyre. Me rëndësi për përfituesit është dakordësimi me masën e përfitimit. "Personat që preken nga ky projekt të cilët kanë emrin në tabelën e publikuar dhe personat të cilët preken, por nuk figurojnë në listë, jo më vonë se 15 ( pesëmbëdhjetë) ditë nga publikimi në Fletoren Zyrtare, kanë të drejtë të paraqesin pretendimet e tyre, të shoqëruara me dokumentacionin përkatës, si edhe të shprehen nëse janë dakord me të dhënat e publikuara për përfundimin e procedurave të shpronësimit, në shoqërinë ' G2 Infra' sh. p. k., si dhe në Agjencinë Shtetërore për Shpronësim".