Themelohet Konfederata e Opozitës, ftesë Bashës në frontin anti- Rama

Zbardhet marrëveshja, partitë e opozitës platformë të përbashkët: Qeveria po kontrollon të gjitha pushtetet. Caktohen 4 koordinatorë

Pas bashkimit të dy nga 3 grupimet e Partisë Demokratike, opozita zyrtarizoi dje bashkimin e të gjitha forcave të saj në një konfederatë, që do të drejtohet nga 4 koordinatorë.

Qëllimi i bashkimit të forcave opozitare 1 vit përpara zgjedhjeve, ka qëllim kryesor largimin e mazhorancës së Edi Ramës, që e shohin përgjegjës jo vetëm për rrënimin e vendit, por dhe copëtimin e vetë opozitës. Dhe strategjia do të nisë me protestën e 20 Shkurtit përpara Kryeministrisë. Mësohet se Fatmir Mediu dhe Agron Duka dy ditë më parë kanë njoftuar Lulzim Bashën për platformën e tyre të bashkimit të opozitës në një “Federatë”. Basha nuk ka kthyer asnjë përgjigje për propozimin që ka ardhur nga aleatet historik të PD- së. Qëndrimi që do të mbajë opozita në parlament është çështje që kërkon zgjidhje sipas njërit prej nismëtarëve të Konfederatës së Opozitës, Fatmir Mediut. “E menjëhershme, ka të bëjë me kushtetutshmërinë e Parlamentit”, - tha Mediu. Ndërsa prioritet mbeten amendimet në Kodin Zgjedhor, për një garë të ndershme. “Na bashkon dhe kërkesa që të rishikohet formula e koalicionit parazgjedhor”, - deklaroi Vangjel Dule. Nuk e mori fjalën në tryezë, por pas takimit, Gazmend Bardhi e vlerësoi si një ditë të mirë për opozitën pasi përçarja e saj ishte sipas tij, dhurata më e madhe për Edi Ramën. Ai nuk e mbyll derën për asnjë opozitar që kërkon t’i bashkohet Konfederatës, as dhe për vetë Lulzim Bashën. “Cilido që ndjehet në opozitë, e vetmja rrugë për t’u forcuar është të bëhemi të gjithë bashkë”, - theksoi Bardhi.

“Firmën në marrëveshje e hodhën kreu i Partisë Republikane, Fatmir Mediu, kreu i Partisë Agrare Ambientaliste Agron Duka, kreu i Partisë së Lirisë Ilir Meta, kreu i Partisë Demokristiane, Nard Ndoka dhe drejtues të tjerë partish opozitare. Në marrëveshje ka munguar firma e kreut të LZHK, Dashamir Shehu dhe kreut të PDIU, Shpëtim Idrizi. Po ashtu, kreu i Partisë Demokratike zyrtare, Lulzim Basha, nuk është bashkuar”

MARRËVESHJA

Firmën në marrëveshje e hodhën kreu i Partisë Republikane, Fatmir Mediu, kreu i Partisë Agrare Ambientaliste Agron Duka, kreu i Partisë së Lirisë Ilir Meta, kreu i Partisë Demokristiane Nard Ndoka dhe drejtues të tjerë partish opozitare. Në marrëveshje ka munguar firma e kreut të LZHK, Dashamir Shehu dhe kreut të PDIU, Shpëtim Idrizi. Po ashtu, kreu i Partisë Demokratike zyrtare, Lulzim Basha, nuk është bashkuar. Marrëveshja parashikon institucionalizimin e Federatës së Opozitës së Bashkuar, sipas parimit, “Edhe pse të ndryshëm, kemi një qëllim të përbashkët, ndërtimin e një Shqipërie Europiane”, ku përfshihen të gjithë faktorët politikë parlamentarë dhe relevant opozitar, të cilët marrëdhënien dhe bashkëpunimin opozitar e çmojnë si detyrim dhe jo marrëveshje që fuqizojnë qeverinë dhe antikushtetutshmërinë. Opozita e bashkuar rikonfirmon vendosmërinë për t’u përballur, siç thotë ajo, “me regjimin e korruptuar dhe të kriminalizuar të Edi Ramës, që gjatë qeverisjes së tij ka shndërruar Shqipërinë në vendin e pamundësive për shqiptarët e ndershëm dhe po detyron rininë të braktisë vendin për shkak të pamundësive ekonomike”. Federata e Opozitës së Bashkuar shpalli edhe prioritetet që janë, “garantimi i zgjedhjeve të lira dhe të ndershme”, përmes realizimit të një Reformë Zgjedhore kuptimplotë dhe për adresimin e të gjitha rekomandimeve të ODIHR- it, që siguron një kuadër zgjedhor gjithëpërfshirës dhe të qëndrueshëm, si dhe nevojën për të koordinuar përpjekjet për rikthimin e pluralizmit dhe demokracisë funksionale”. Grupimi i opozitës deklaron se: “Institucionalizimin e Federatës së Opozitës së Bashkuar, sipas parimit ‘ Edhe pse të ndryshëm, kemi një qëllim të përbashkët, ndërtimin e një Shqipërie Europiane’, ku përfshihen të gjithë faktorët politikë parlamentarë dhe relevantë opozitarë, të cilët marrëdhënien dhe bashkëpunimin opozitar e çmojnë si detyrim dhe jo marrëveshje, që fuqizojnë qeverinë dhe antikushtetutshmërinë. Rikonfirmojmë vendosmërinë për t’u përballur me regjimin e korruptuar dhe të kriminalizuar të Edi Ramës, që gjatë qeverisjes së tij, ka shndërruar Shqipërinë në vendin e pamundësive për shqiptarët e ndershëm dhe po detyron rininë të braktisë vendin për shkak të pamundësive ekonomike. Shpallim: i) “garantimin e zgjedhjeve të lira dhe të ndershme”, përmes realizimit të një Reformë Zgjedhore kuptimplotë dhe për adresimin e të gjitha rekomandimeve të ODIHR- it, që siguron një kuadër zgjedhor gjithëpërfshirës dhe të qëndrueshëm, si dhe ii) “nevojën për të koordinuar përpjekjet për rikthimin e pluralizmit dhe demokracisë funksionale”, - si dy prioritete kryesore të agjendës politike të opozitës”.