Ministria e Brendshme, urdhër IKMT- së për marrjen e masave: Të raportohet çdo të hënë

Ministria e Brendshme ka urdhëruar strukturat shtetërore të mbrojtjes së mjedisit të marrin masat për të kontrolluar dhe ndaluar ndërtimet pa leje në anë të akseve kombëtare apo pikave kufitare.

Po ashtu, duhet të merren masa edhe për moslejimin e grumbullimit të mbetjeve në këto akse, kryesisht në rrugët kryesore dhe dytësore. Edhe pse në fakt ndërtimet në anë të rrugëve janë të shumta, ministri në shkresën e bërë publike thekson edhe grumbullimin e mbetjeve, kryesisht për pikat e grumbullimit të mjeteve motorike! Urdhri i firmosur nga ministri Taulant Balla hynë në fuqi menjëherë.

URDHRI

"Marrjen e masave të menjëhershme për kontrollin, mbrojtjen e territorit nga ndërhyrjet dhe zhvillimet e kundërligjshme përgjatë autostradave, rrugëve interurbane kryesore si dhe në rrugët interurbane dytësore që ndodhen në zona ku zhvillohen veprimtari turistike. Kontrolli dhe monitorimi i territorit dhe marrja e masave sipas përcaktimeve të pikës 1, të kryhet nga Inspektorati Kombëtar të Mbrojtjes së Territorit ( IKMT). Inspektorati i Kombëtar i Mbrojtjes së Territorit të hartojë planet e punës për monitorimin e territorit, për mbrojtjen e territorit nga ndërhyrjet dhe zhvillimet e kundërligjshme veçanërisht duke pasur në konsideratë ndalimin e krijimit dhe mbylljen e vendgrumbullimeve dhe grumbullimin e mjeteve motorike, rimorkiove, si dhe të pjesëve të tyre të këmbimit, të dala jashtë përdorimit, si dhe mbrojtjen e përbërësve të mjedisit, sipas legjislacionit në fuqi, si dhe çdo lloj ndërhyrje tjetër ose zhvillim të kundërligjshëm. Inspektorati i Kombëtar i Mbrojtjes së Territorit organizon punën për mbledhjen e informacionit në lidhje me paligjshmërinë, duke shfrytëzuar për këtë qëllim të gjitha burimet e informacionit: të dhënat që vijnë nga komunikimet elektronike/ telefonata; denoncimet dhe ankesat e personave dhe informacionet që vijnë nga personat juridikë. Inspektorati i Kombëtar i Mbrojtjes së Territorit kërkon informacione nga Bashkitë, Prefektët dhe subjektet e tjera të interesuara me qëllim përmbushjen e detyrave të përcaktuara në këtë urdhër. Inspektorati i Kombëtar i Mbrojtjes së Territorit organizon ngritjen e grupeve të përbashkëta të punës ndërmjet IMT- Vendore dhe drejtorive rajonale të IKMT- së, për monitorimin dhe inspektimin e vazhdueshëm të territorit. Inspektorati i Kombëtar i Mbrojtjes së Territorit për realizimin e çështjeve të parashikuara në këtë urdhër përgatisin planin e masave, në të cilin përfshihet, përshkrimi i vendit ku do kryhet mbështetja, vlerësimin e situatës dhe të riskut, si dhe planifikimin e forcave dhe të mjeteve që janë të nevojshme për të kryer mbështetjen. Në rastet e konstatimit të paligjshmërisë, IKMT për veprimet procedurale penale ndaj personit përgjegjës kërkon ndihmën e Policisë së Shtetit. Inspektorati Kombëtar i Mbrojtjes së Territorit hartojnë raportin e përbashkët ose të veçantë javor, për strukturat eprore. Inspektorati Kombëtar i Mbrojtjes së Territorit raporton çdo ditë të hëne pranë Ministrit të Brendshëm në kuadër të raportimeve periodike mujore. Për zbatimin e këtij urdhri ngarkohen Inspektorati Kombëtar i Mbrojtjes së Territorit. Ngarkohet Sekretari i Përgjithshëm të sigurojë zbatimin dhe kontrollin e zbatimit të këtij urdhri. Ky urdhër hyn në fuqi menjëherë"!