FMN e Banka Botërore në Tiranë, Rama: Sfidë, rritja e pagave dhe kapitali njerëzor
"Të frenojmë konkurrencën e ashpër nga vendet e përparuara. Deri në 2030, Shqipëria do jetë eksportuese neto e energjisë"
Ditën e djeshme, u zhvillua Mbledhja e Nivelit të Lartë të Konstituencës së Fondit Monetar Ndëkombëtar dhe Bankës Botërore me pjesëmarrjen e kryeministrit Edi Rama, ministrit të Financave, Ervin Mete, drejtorit Ekzekutiv për Shqipërinë në FMN, Federico Giammusso, drejtorit Ekzekutiv për Shqipërinë pranë Bankës Botërore Matteo Bugamelli.
Kreu i qeverisë vuri në dukje se Shqipëria po përjeton një trend pozitiv që ka ardhur në përmirësim pas pandemisë. "Menjëherë pas pandemisë numrat e turistëve po rriten dhe Shqipëria dhe aeroporti e shohim që po përjeton një trend pozitiv. Rinasi ka qenë i renditur i pari në Europë sa i takon nivelit të rimëkëmbjes pas pandemisë. Ne jemi renditur në vendin e tretë në rang botëror nga Organizata Botërore e Turizmit sa i takon rritjes së turizmit vitin e kaluar. Të tretët pa pasur ndonjë aktivitet të veçantë si Kupa e botës, një arritje e madhe për të ecur para. Në janar kemi pasur afro 500 mijë turistë dhe aeroporti ynë ua ka kaluar dhe shumë aeroporteve të tjera, edhe të Beogradit dhe në vetëm sa mund të përfytyrojmë se si do jetë sezoni i ardhshëm, ku shumë italianë kanë ardhur në bregdetin shqiptar", tha kreu i qeverisë, duke shtuar më tej se sfidë aktuale mbetet rritja e pagave me qëllim për të ruajtur burimet njerëzore gjithnjë në ulje. "Sfida e madhe mbetet rritja e mëtejshme e pagave në mënyrë që të jemi në gjendje që të përballim konkurrencën shumë të ashpër që po bëhet gjithmonë e më e fortë nga shumë vende të tjera të përparuara që kërkojnë fuqi punëtore".
Përfaqësuesit e FMN dhe BB nga njëra anë shprehën mbështetjen e nga tjetra kërkuan më shumë punë nga institucionet shqiptare në drejtim të transformimit ekonomik. Federico Giammusso dhe Matteo Bugamelli vlerësuan se ka ardhur koha që Shqipëria të kalojë në një tjetër model ekonomik, më të përparuar e që prodhon më shumë. Ata prezantuan perspektivat e këtyre dy institucioneve lidhur me sfidat globale si, luftrat dhe konfliktet, rritja e frekuencave te fatkeqesive natyrore, shtimi i varferise dhe pabarazise dhe hapat qe ata po ndërmarrin për t'i trajtuar këto probleme duke synuar rritjen e qëndrueshme të ekonomive të vendeve.
BATUTAT E RAMES
Kreu i qeverisë u shpreh se bashkëpunimi i ngushtë me Bankën Botërore është çelësi i suksesit të vendit tonë, teksa shtoi se para se të bëhej kryeministër as nuk e kishte çuar nëpër mend që do të fliste mirë për Bankën Botërore. "Kam zbuluar që Banka Botërore ka një zemër", tha me humor Rama duke shtuar se "disa herë është e madhe dhe natyrisht do të donim të ishte akoma më e madhe". "Uroj që marrëdhënia me bankën tonë të forcohet dhe që Guvernatori të marrë inkurajime nga ana juaj që të jemi më të guximshëm dhe kreativ në modernizimin e mëtejshëm të sistemit tonë financiar", tha kryeministri në mbyllje të fjalës, pasi u largua për të udhëtuar drejt Mynih ku do të marrë pjesë në konferencë. "Është një prej arsyeve të suksesit tonë, që është bashkëpunimi i ngushtë me BB dhe dialogun konstruktiv që ne kemi falë Bankës Botërore. Asnjëherë nuk e kam menduar, derisa u bëra kryeministër, nuk e kisha çuar nëpër mend që do të thosha ndonjë fjalë të mirë për BB. Vetëm kur u bëra kryeministër arrita ta kuptoj, por kanë një mënyrë shumë të mirë dhe kemi pasur privilegjin të punojmë më drejtorët e rajonit dhe me ata të misionit në Shqipëri, që s'kanë qenë aspak të ngurtë në marrëdhënie me ne, duke na dhënë leksione".
PLANI PER ENERGJINE
Kryeministri Edi Rama shprehu synimin e qeverisë për të kthyer Shqipërinë në eksportuese neto të energjisë deri në vitin 2030. Në takimin e djeshëm, kreu i qeverisë tha se pavarësisht krizës energjetike që përfshiu globin, Shqipëria ndërmori reforma dhe mbrojti familjet duke mos ua rritur çmimin e energjisë. "Mund të jeni në dijeni për reformën që kemi ndërmarrë, ia kemi dalë që të kemi një situatë të qëndrueshme dhe të mos e rrisim më çmimin e energjisë ndonëse kemi qenë të sfiduar nga kriza globale e energjive, në veçanti kriza e çmimeve të energjisë në Europë. Synimi është ta kthejmë Shqipërinë në eksportuese neto të energjisë deri në 2030, prandaj jemi duke investuar në burimet e energjisë nga era dhe dielli dhe të jemi një vend ku prodhimi i energjisë elektrike të jetë 100% i rinovueshëm".