Vdekja e Navalnyt, SHBA dhe BE: Përgjegjës, regjimi rus!
Sekretari i Shtetit: Për më shumë se një dekadë, qeveria ruse, Putin, e ka persekutuar, helmuar dhe burgosur Navalny
SHBA- ja dhe BE bëjnë përgjegjës regjimin e Putinit për vdekjen në burg të opozitarut Alexei Navalny.
Sekretari amerikan i Shtetit Antony Blinken, reagoi pas lajmit të vdekjes në burg të kritikut më të ashpër të Vladimir Putinit, Alexei Navalny, lider i opozitës ruse. Blinken e konsideroi Rusinë përgjegjëse për vdekjen e tij, nëse raportet e deritanishme, rezultojnë të vërteta. "Ne kemi parë raportet nga Rusia për vdekjen e Alexei Navalny. Për më shumë se një dekadë, qeveria ruse, Putin, e ka persekutuar, helmuar dhe burgosur atë. Para së gjithash, nëse këto raporte janë saktë, ngushëllimet dhe lutjet tona shkojnë për gruan dhe familjen e tij. Përtej kësaj, vdekja e tij në një burg rus dhe fiksimi dhe frika e një burri, vetëm nënvizon dobësinë dhe kalbjen në zemër të sistemit që Putini ka ndërtuar. Rusia është përgjegjës për këtë, ne do të flasim me shumë vende të tjera për Alexei Navalny, veçanërisht nëse këto raporte dalin të vërteta", shprehet Blinken. Edhe Bashkimi Europian reagoi në lidhje me vdekjen e udhëheqësit të opozitës ruse Alexei Navalny, i cili ndërroi jetë këtë të premte në ambientet e burgut, ku ishte transferuar në Siberi. Në lidhje me lajmin ka reaguar dhe Presidenti i Këshillit Evropian, Charles Michel, i cili bën fajtor për vdekjen regjimin e presidentit Vladimir Putin. Në një reagim në "Facebook", Michel i shpreh ngushëllimet familjarëve dhe nënvizon se luftëtarët vdesin, por lufta për liri nuk mbaron kurrë. "Alexei Navalny luftoi për vlerat e lirisë dhe demokracisë. Për idealet e tij, ai bëri sakrificën e fundit. BE- ja e konsideron regjimin rus si përgjegjës të vetëm për këtë vdekje tragjike. I shpreh ngushëllimet më të thella familjes së tij. Dhe atyre që luftojnë për demokraci në mbarë botën në kushtet më të errëta. Luftëtarët vdesin. Por lufta për liri nuk mbaron kurrë", shkroi në "X" Michel. Jens Stoltenberg, sekretari i Përgjithshëm i NATO- s , deklaroi se është "i pikëlluar dhe i shqetësuar nga raportet që vijnë nga Rusia". Vdekja e Navalny është "lajm i tmerrshëm" thotë kryeministri i Mbretërisë së Bashkuar Rishi Sunak, i cili shprehet se "demonstroi guxim të jashtëzakonshëm gjatë gjithë jetës së tij". Kurse kancelari gjerman Olaf Scholz deklaroi se aktivisti "e pagoi guximin me jetën e tij". Navalny u pa për herë të fundit në një video- telefonatë në janar, duke bërë shaka për veshjen e tij të burgut në koloninë penale të Arktikut, ku ishte transferuar një muaj më parë. Kolonia "IK- 3", me nofkën "Ujku Polar", është në qytetin verior të Kharp, rreth 1,900 km ( 1,200 milje) në verilindje të Moskës. Është parë si një nga burgjet më të vështira në Rusi dhe shumica e të burgosurve të mbajtur atje janë dënuar për krime të rënda. Duke folur për gazetarët në fund të dhjetorit, Navalny dukej se ishte në gjendje të mirë shpirtërore, duke bërë shaka se ende nuk kishte marrë ndonjë dhuratë për Krishtlindje, pasi është shumë larg. Alexei Navalny jetoi dhe vdiq duke luftuar kundër regjimit të Vladimir Putin dhe korrupsionit në zemër të tij. Në vitin 2018, atij iu ndalua kandidimi në zgjedhje, duke mbetur kështu kundërshtari më i fuqishëm politik i Putinit. Navalny ishte njeriu i vetëm i aftë të nxirrte dhjetëra mijëra persona në rrugë duke bërë thirrje për një Rusi pa Putinin - dhe njeriu i vetëm që presidenti i Rusisë refuzoi të përmendte me emër. Ai ishte kokëfortë, sarkastik dhe jashtëzakonisht karizmatik - një populist i lindur me një sens humori që tërhiqte veçanërisht të rinjtë. Hetimet e tij në Youtube për miqtë e Putinit, dhe më në fund vetë presidentin, mblodhën miliona shikime dhe ekspozuan korrupsionin në nivelet më të larta. Por, kjo bëri që sai të krijonte armiq gjithmonë e më të fuqishëm. Për një dekadë Navalny duroi një sërë arrestimesh, paraqitje në gjykatë dhe periudha në paraburgim, por ai mbijetoi. Kur Putin pushtoi Ukrainën, Navalny u bëri thirrje njerëzve nga qelia e tij që të mbanin një qëndrim, por vetëm një pakicë e vogël ishte mjaft e guximshme sa të pranonin thirrjen e tij. Protestat kundër luftës u shtypën shpejt. Me gjithë përpjekjet e tij më të mira për t'i dhënë zë popullit, mesazhi i tij nuk arriti të rezononte me shumicën e rusëve, të penguar nga dy dekada të sundimit të Putinit. Kremlini grumbulloi akuza të reja kundër tij për ekstremizëm dhe terrorizëm - një nga akuzat, në mënyrë absurde, është rehabilitimi i nazizmit. Në gusht 2023, ai u dënua me 19 vjet të tjera burg në një regjim të posaçëm penal, për shkelësit më të këqij. Në fakt ky ishte edhe një dënim me vdekje për të. Duke qenë se vendosej shumë shpejt në izolim, shëndeti i Navalny u përkeqësua. Vdekja e tij në burg në moshën 47- vjeçare është një tjetër njollë e tmerrshme në ndërgjegjen e shtetit rus.