Arrestohet ‘ maniaku’ 27- vjeçar, Policia: E mitura i tha se do të vras veten
Benard Çullhaj hapte profile false dhe kërcënonte femra, mbi tri raste të identifikuara. Reagon Balla: Do të ndërhymë në ligj!
Shantazhet dhe kërcënimet në rrjetet sociale janë kthyer tashmë në një problem vërtet serioz.
Më në fund, pas një mori rastesh të njëpasnjëshme që po trondisin opinion, janë ndërgjegjësuar edhe institucionet përgjegjëse dhe që kanë për detyrë hetimin, jo vetëm të denoncimeve. Rasti më i fundit ka në shënjestër sërish një femër, vetëm 15 vjeç. Kërcënuesi i saj është një 27- vjeçar, i cili aq shumë e ka shantazhuar vajzën- fëmijë sa ajo ka premtuar se do të kryejë edhe vetëvrasje. Mirëpo, personi- maniak, në fakt 15- vjeçaren e kishte thjeshtë prenë e radhës. Ai më herët kishte kërcënuar edhe dy vajza të tjera, pak a shumë në të njëjtën moshë si me vajzën që Policia e Tiranës e bëri personazh ditën e djeshme duke i publikuar edhe përbetimin e saj për vetëvrasje që i bënte kërcënuesit të saj. Nga një anë ministri i Brendshëm betohet se do të kërkojë ndryshime ligjore, e nga ana tjetër rastet e njohura shtohen përditë. Po ashtu kërkohet që femrat e shantazhuara me anë videosh dhe fotosh të denoncojnë, por nga ana tjetër askush nuk merr përsipër të monitorojë këto faqe online për të identifikuar qindra e mijëra raste që nuk denoncojnë për një mori motivesh, ashtu siç nuk bëri viktima e pak ditëve më parë në Kamzë, e cila u hodh nga tarraca e pallatit pas publikimeve të fotove nga një psikopat që shantazhonte njerëz prej më shumë se një dekade. Policia ditën e djeshme e ka sjellë në pranga shantazhuesin e minorenes, i cili i ka thënë policisë se po bënte shaka, ndërkohë që dyshohet edhe për raste të tjera përpos tri rasteve të identifikuara tashmë.
POLICIA
“Më sill foto…”, i shkuan Benard Çullhaj, 27 vjeç, një vajze të mitur përmes rrjeteve sociale. I riu e shantazhonte dhe në këmbim i kërkon marrëdhënie seksuale. Edhe kthimi i përgjigjes “Do iki të vras veten” nga 15vjeçarja, nuk e ndalte maniakun Çullhaj, i cili me sa duket e kishte kthyer në trend ngacmimin e vajzave të vogla. Pasi kishte hapur profile në emrin e vajzës, kryesisht në Tik- Tok, i kërkonte foto dhe video në formën e shantazhit. Por, e reja mori guximin dhe u paraqit pranë krimit kibernetik në Policinë e Tiranës dhe denoncoi agresorin, i cili brenda pak orëve u vu në pranga.
Mjaftuan disa kërkime të specializuara nga ekspertët kibernetikë për të lokalizuar dhe arrestuar të riun. Para hetuesve Benard Çullhaj ka folur pak, por kur e kanë pyetur pse kishte nisur mesazhe kërcënuese dhe kishte hapur profile false ndaj një të miture, ai është përgjigjur shkurt: Po bëja shaka!
Më tej, 27- vjeçari mësohet se nuk jepte detaje, por në administrim të “kibernetikës” tashmë janë me dhjetëra mesazhe intimiduese, kërcënuese dhe me fjalor të ndyrë, jo vetëm ndaj 15- vjeçares.
Krimi kibernetik thotë se janë konfirmuar të paktën edhe 2 raste të tjera mesazhesh kërcënuese tek 2 të mitura, 15 dhe 16 vjeçe, te të cilat është ndjekur e njëjta skemë intimidimi. Burime bëjnë me dije se Benard Çullhaj u niste mesazhe të gjitha grave që i dilnin përpara në rrjete sociale dhe provat kundër tij janë të shumta.
Celulari i tij tashmë është në duar të hetuesve dhe do të shërbej si provë për veprimtarinë e tij të paligjshme. Atij i janë sekuestruar me qindra pamje filmike, foto dhe video, profile në Tik- Tok dhe rrjete të tjera sociale, të cilat do t‘ i në nënshtrohen një analize të thellë hetimore, për të dokumentuar çdo rast ku është i përfshirë.
DËSHMIA
Sipas të dhënave të policisë, Benard Çullhaj ka deklaruar para hetuesve të krimit kibernetik të Tiranës se “po bëja shaka” për të gjitha mesazhet që u ka dërguar vajzave të mitura, dhe jo vetëm, përmes rrjeteve sociale. Atij i janë gjetur me dhjetëra komunikime në celularin që tashmë është në duar të hetuesve, ndërsa të njëjtën praktikë e ka kryer me shumë vajza të tjera, të cilave u ka kërkuar marrëdhënie seksuale dhe u ka hapur profile në emrin e tyre. Burime pranë krimit kibernetik bëjnë me dije se janë administruar dhjetëra biseda me vajza të ndryshme, të cilave ai u ka shkruar fjalë nga më të ndyrat, nga kërcënimet tek sharjet, të cilat do të shërbejnë si provë në vijimësi të hetimeve për 27- vjeçarin e vënë në pranga tashmë.
Policia e Tiranës në njoftimin zyrtar saktësoi
se: “Specialistët e Sektorit për Hetimin e Krimeve Kibernetike në DVP Tiranë, pas kallëzimit të bërë nga një e mitur 15- vjeçare, se një shtetas i kishte hapur profile false në rrjete sociale dhe e shantazhonte për ti dërguar foto/ video intime, si dhe për të kryer marrëdhënie seksuale me të, menjëherë kanë organizuar punën për identifikimin dhe kapjen e autorit. Si rezultat, pas një hetimi shumë të shpejtë dinamik dhe të mirëfilltë, në drejtimin e Prokurorisë së Tiranës, në kuadër të operacionit policor të koduar “Intimiduesi”, në bashkëpunim dhe me Komisar
iatin e Policisë Nr. 5, u ndalua shtetasi B. Ç., 27 vjeç, banues në Tiranë. Nga verifikimet e kryera ka rezultuar se ky shtetas, i ka hapur profile false, një 15- vjeçareje, në rrjete sociale, e shantazhonte për t` i dërguar foto/ video intime dhe për të kryer marrëdhënie seksuale me të. Gjithashtu, nga veprimet hetimore të kryera, janë dokumentuar dy ngjarje të tjera të kësaj natyre kriminale, me autor të dyshuar 27- vjeçarin dhe dy të dëmtuara 15 dhe 16 vjeçe. Materialet procedurale për këtë rast i kaluan Prokurorisë, për veprime të mëtejshme”.