Manaj është "snajper" Uzuni kap Viniciusin
Myrto shpëton Granadën, gol dhe festë si shqiponjë
Sulmuesit shqiptarë, Myrto Uzuni dhe Rei Manaj kanë qenë protagonistë në ndeshjet e tyre gjatë fundjavës.
I pari realizoi një gol të bukur për të shmangur humbjen e Granadës, ndërsa i dyti vazhdon të kalojë një formë të jashtëzakonshme në Turqi duke gjetur rrjetën nga goditja e dënimit.
"Snajperi" Manaj - Ai ka pasur fatin që në karrierën e tij të debutojë me Interin, por edhe të stërvitet me Lionel Mesin për një kohë të gjatë te Barcelona. U aktivizua me ekipin B, por për çështje detajesh nuk luajti dot me ekipin kryesor të katalanasve: Itali, Spanjë dhe Angli. Sot luan në kampionatin turk, por ndoshta ky është momenti më i artë në karrierën e Rei Manajt. Në kuptimin e protagonizmit dhe golave, me të cilët po nderon skuadrën e Sivasporit në elitën e futbollit turk. Këtë fundjavë realizoi një tjetër supergol nga goditja e dënimit në sfidën ndaj Hatajsporit, i dyti radhazi nga jashtë zone. Tashmë është shndërruar në një "snajperist" sepse po rezulton vendimtar me goditjet e dënimit. Një javë më parë realizoi ndaj Rezisporit. Atëherë përdori teknikën dhe forcën, ndërsa ditën e shtunë me një predhë të vërtetë theu portierin kundërshtar. Nga Turqia raportojnë se goditja e tij ka qenë 139 kilometra në orë. Ky ishte goli i 13- të sezonal për Manajn, dhe i 17ti në total duke llogaritur edhe ata në Kupën e Turqisë. Në kampionat renditet shumë afër sulmuesve kryesorë si, Ikardi dhe Xheko. Me formën që po kalon, Manaj është i pozicionuar mirë si një nga kandidatët për të qenë në kampionatin Europian. Nëse vazhdon në këtë formë, sigurisht që Silvinjo do ta ketë në konsideratë, edhe pse gjatë kohëve të fundit nuk është grumbulluar për shkak të dëmtimeve dhe faktit që nuk po luante. Me shumë mundësi, ai do të ketë një provë të vërtetë në ndeshjet miqësore që Kombëtarja do të luajë kundër Kilit dhe Suedisë në muajin mars. Por pavarësisht gjithçkaje që do të ndodhë, Rei Manaj është lojtari shqiptar i momentit.
Shënon Uzuni- Myrto Uzuni rikthehet te goli. Sulmuesi i Kombëtares shqiptare gjeti rrugën e rrjetës në duelin e javës së 25- të në kampionatin spanjoll në duelin vendimtar kundër
Almerias. Në një sfidë që Granada duhet ta fitonte patjetër, sulmuesi i Kombëtares shqiptare dha një kontribut të madh, por pa arritur dot që t'i jepte ekipit pikët e plota. Megjithatë, për
Uzunin ky ishte goli i shtatë në kampionatin spanjoll. Beratasi luante si sulmues qendre në këtë ndeshje dhe u shkëput mes dy lojtarëve për të realizuar një gol të bukur. Ishte goli i barazimit, që mbeti në fuqi deri në fundin e sfidës. Uzuni barazoi në këtë mënyrë lojtarët e rëndësishëm të La Ligas si Vinicius apo Ferran Torres, të cilët kanë shënuar nga 7 gola në këtë sezon.