Inxhinieri Nazarko: Mund të isha viktimë, pse kallëzova Ballukun
Inxhinieri gjeodet, Romeo Nazarko, ka treguar se kosto për ndërtimin e aksit rrugor Korçë- Ersekë është “fryrë” nga 1 në 5 milion euro për kilometër.
Inxhinier Nazarko ka ngritur padi rreth 3 vite më parë ndaj ministres së Infrastrukturës Belinda Balluku, drejtorit të ARRSHsë, Ergys Vjerdho dhe kompanisë “A. N. K” sh. p. k., që ndërtonte aksin.
Në një intervistë për “News24”, ai ka deklaruar se ka bërë kallëzimin penal për shkelje teknike dhe procedura të tenderit. Romeo Nazarko tha se ka konstatuar 3 shkelje, ndryshimin e gjurmës së rrugës, fryrjen e kostos nga 1 milion euro ne 5 milionë euro kilometri, si dhe ka ndikuar në shpopullimin e zonës.
“Me zhvendosjen e gjurmës së rrugës shpopullohej e gjithë zona e pllajës së Gramozit, edhe Kolonjën”, tha ai. Inxhineri u shpreh se dosja është në fazë hetimi nga Prokuroria e Posaçme për shpërdorim detyre dhe pabarazi në tendera.
“E frekuentoj shumë atë zonë dhe mund të isha
edhe unë viktimë e kësaj vepra penale. Problematika ka ardhur për shkak të projektit shumë të dobët dhe jo teknik, jo profesional, për fat të mirë dhe të keq, inxhinieria nuk të lejon të gabosh. Nëse ti anashkalon rregullat teknike vepra bie”, tha Nazarko.
Z. Nazarko, 3 vite më parë iu jeni drejtuar SPAK me një kallëzim penal për rrugën Korçë
Ersekë, a mund të na thoni kë kallëzuat?
Në atë kohë kam kallëzuar drejtorin e Përgjithshëm ARRSH- së Ergys Verdho, ministren e linjës Balluku dhe administratorin e kompanisë “A. N. K” sh. p. k., për shkelje teknike dhe procedura të tenderit.
Cilat janë shkeljet që ju konstatuat që më pas ju drejtuat SPAK?
Shkeljet që unë konstatova ishin 3. Një ka qenë mashtrim në realizimin e projektit për rrugën KorçëErsekë, tjetër gjë ka në terren dhe tjetër gjë përshkruhet në projekt. E dyta, ka qenë vlera e lartë e projektit që shkonte nga 1 milion euro që ishte në projektin e 2010 ne 5 milionë euro kilometri. E treta që ishte më e rëndësishme për mua ishte shpopullimi i zonës. Me zhvendosjen e gjurmës së rrugës shpopullohej e gjithë zona e pllajës së Gramozit, edhe Kolonjën.
A jeni kontaktuar nga prokurorët pasi paraqitët kallëzimin dhe në dijeninë tuaj në çfarë faze janë hetimet?
Jam kontaktuar nga prokurorët. Iu kam dhënë informacion të detajuar dhe teknik se për fatin e mirë unë jam ekspert i kësaj fushe, duke i orientuar drejt dhe saktë ne prova konkrete. Sipas dy shkresave të SPAK, kam dijeni që dosja është në fazë hetimi për shpërdorim detyre dhe pabarazi në tendera.
A jeni marrë në pyetje në cilësinë e kallëzuesit?
Jam marrë në pyetje nga oficeri i Policisë Gjyqësore.
Kur është hera e fundit që jeni pyetur?
Hera e fundit që jam pyetur është para 3 muajsh, jam pyetur edhe përpara një viti e gjysmë.
A i qëndroni të njëjtit kallëzim apo keni konstatuar edhe shkelje të tjera?
I qëndroj të njëjtit kallëzim. E frekuentoj shumë atë zonë dhe mund të isha edhe unë viktimë e kësaj vepra penale. Problematika ka ardhur për shkak të projektit shumë të dobët dhe jo teknik, jo profesional, për fat të mirë dhe të keq, inxhinieria nuk të lejon të gabosh. Nëse ti anashkalon rregullat teknike vepra bie.
Kur thoni që janë anashkaluar rregullat teknike, keni idenë përse ka ndodhur kjo?
Është ndryshuar gjurma e rrugës për të rritur vlerën, sepse një projekt është bërë në 2010 është përcaktuar një vlerë. Për të çuar vlerën nga 1 milionë në 5 milionë euro kilometri, nuk ka inxhinier që ta nxjerrë atë vlerë, dhe e vetmja mënyrë është që të ndryshojë gjurma e rrugës, të bëhet një rrugë tërësisht e re. Dhe duke qenë një rrugë tërësisht e re ka gërmime dhe mbushje shumë, vepra arti dhe për këtë arsye duhet një vlerë shumë e lartë. Pas një investigimi që ka bërë APP, konkludoi me një vendim me shkelje konkrete.