Prokurorët hetojnë “El Gordon”- n, ‘ Bullafiqin’ që kërkohej në 180 shtete
Arrestimi i 17 personave në Spanjë dhe kapja e 820 kilogramëve kokainë Besnik Nikolli, i akuzuar se drejtonte linjën nga Bogota e Kolumbisë, dyshohet se ka lidhje me trafikantët shqiptarë të Valencias
Edhe pse me probleme të shëndetit mendor, Ilir Koçilja, autori i krimit të rëndë të ndodhur ditën e mërkurë në Durrës, ka fajësuar viktimën.
Quhej ‘ Bullafiqi’ dhe konsiderohej një prej trafikantëve më të mëdhenj të kokainës në botë. Kërkohej në 180 shtete, përdorte dy pseudonime dhe kishte pikë të dobët gratë. Arrestimi i tij në Bogota të Kolumbisë ishte një nga lajmet e bujshme të fundgushtit të vitit që lamë pas, por ditëve të fundit, një sasi prej rreth 1 ton kokainë që u kap në Spanjë, i ka kthyer hetuesit sërish tek emri i Besnik Nikollit. Ata pretendojnë se grupi kriminal që është pas linjës së trafikut të kokainës nga vendet e Amerikës Latinë drejt Spanjës janë ushtarë të kapos së prangosur me urdhër të policisë franceze.
OPERACIONI
Policia spanjolle vazhdon hetimet pas goditjes së një organizate kriminale shqiptare që çoi në arrestimin e 17 personave dhe sekuestrimin e 820 kg kokainë. Pas çmontimin të organizatës në Valencia, hetuesit po gjurmojnë lidhjet e saj në Kolumbi.
Në operacion, autoritetet arritën të arrestonin 17 persona, duke përfshirë liderin shqiptar të grupit, i njohur për kontaktet e tij të gjera në Amerikën e Jugut ( Ekuador dhe Kolumbi), si dhe në
Evropë dhe Dubai. Ai drejtonte disa kompani me seli në Spanjë dhe përdorte automjete të nivelit të lartë për aktivitetet e tij. Në fakt, autoritetet po hetojnë nëse ky rrjet kriminal do të ketë lidhje me disa nga shqiptarët që u kapën vitin e kaluar në Kolumbi, mes tyre edhe Besnik Nikolli, i kërkuar për ekstradim nga Franca, i cili u arrestua në Santa Marta në gusht 2023. Nikolli njihet edhe me pseudonimet “Niko” dhe “El Gordo”, shkruajnë mediat. Në 8 kontrolle të kryera gjatë operacionit në Spanjë, ndër të tjera u konfiskuan më shumë se 820 kilogramë kokainë, 226 500 euro cash, tri pajisje zbulimi GPS, 13 automjete ( pesë me ndarje sekrete) dhe dy inhibitorë.
ARRESTIMI I NIKOLLIT
Pas rënies në pranga të Bensik Nikollit, ishte një gazeta kolumbiane që investigoi në lidhje me mënyrën se si u soll në pranga trafikanti shqiptar. Sipas të dhënave u mësua se për më shumë se 10 vjet shërbimet e inteligjencës nga të paktën katër shtete kanë qenë në kërkim të “El Gordos” drejtuesit të një organizate shqiptare të dedikuar për rishitjen e kokainës, heroinës dhe drogave të tjera në rajonin e Lionit të Francës. Një investigim i të përditshmes kolumbiane “El Tiempo” zbulon sesi hetuesit e Europol dhe Interpol ranë në gjurmët e Besnik Nikolli i njohur në botën e krimit si “Niko” apo “El Gordo” që nga spanjishtja përkthehet “Bullafiqi’. Ai ishte vendosur në vitin 2021 në Kolumbi për të krijuar aleanca me kartelet që veprojnë atje dhe jetonte në një lagje të njohur të Santa Marta dhe qëndroi atje për dy vjet pa u zbuluar. Ishin një seri fotosh që ua dërgonte ‘ online’ vajzave, të cilat ndihmuan për të zbuluar vendndodhjen e personit më të kërkuar në Francë për trafik droge dhe pastrim parash. ‘ Niko’ kishte lidhje me organizata të trafikut të drogës në Shqipëri, Holandë dhe Gjermani, të cilët ishin partnerë të tij në Evropë dhe ishin përgjegjës për marrjen e drogës bëhet i ditur nga investigimi i publikuar nga “El Tempo”. Agjenti i infiltruar i shfaqet shqiptarit si grua. Agjentët francezë arritën ta zbulonin bosin shqiptar përmes pikës së dobët që ai kishte, pikërisht gratë. “Hetuesit përdorën si karrem në internet një grua. Një agjent sekret u hoq si grua ‘ online’ dhe fitoi besimin e “Nikos” tha një burim për këtë gazetë. Sipas autoriteteve, shqiptari rrallëherë dilte nga rezidenca e tij një apartament modest në lagjen San Pablo të Santa Martës, ku organizonte festa me vajza. “Ai i tha vajzës ( agjentit sekret) se jetonte në Bogota dhe shkonte në bregdet vetëm për një shëtitje”, tha një burim gjyqësor. Më pas nisi të dërgonte foto të udhëtimeve dhe pasurive, agjentit të infiltruar që hiqej si vajzë. Në një nga ato imazhe dërgoi dhe vendndodhjen gjeografike. Në këtë moment nisi dhe operacioni për arrestimin e tij. ‘ El Tiempo’ publikoi aso kohe edhe foto ku “bullafiqi” pozon para makinave luksoze, në ferma në Evropë dhe madje edhe në një lokal në Santa Marta ndërsa fotografia e fundit ka qenë ajo që ka bërë të mundur lokalizimin e vendndodhjes. “Ne dinim vetëm se ai ishte në Kolumbi, sepse kishte hyrë përmes Bogotas, por nuk figuronte në të dhëna. Franca këmbënguli që ‘ Niko’ ishte në Kolumbi” deklaruan hetuesit, shkruan gazeta.