Protesta, Noka: Nga sot nuk e njohim më Ramën si kryeministër

Deputeti Flamur Noka e cilësoi historike, protestën e djeshme të opozitës përballë Kryeministrisë. Ai theksoi se ky vërshim i qytetarëve ka frikësuar kryeministrin Rama dhe njerëzit e tij të korruptuar. Noka theksoi se sot opozita dhe shqiptarët nuk e njohin më Edi Ramën si kryeministër. “Do të mbahet mend gjatë kjo ditë, do të mbahet mend gjatë ky moment. Jemi të bindur se ky moment do të hyjë në histori, me këtë vërshim madhështor, i cili ka një qëllim, të ndërpresë projektin më të errët, skenarin më të zi, planin ogurzi të Ramës për asgjësimin e opozitës. Një person këtu që sundon prej 11 vitesh që ka kapur çdo zyrë pushteti, vjedh dhe blen votën, ndan pasuritë e vendit, është në krye të çdo afere, jep miliona euro familjarëve, udhëton si sheik me avion nga taksat tuaja, që bën një kopsht këtu mbrapa 4 milionë euro. Të gjitha i bën me paratë tuaja, i bën për tekat e tij personale. Sot me këtë vërshimin tuaj madhështor, ky person është i vetmi i palumtur, i trishtuar, i shqetësuar, sepse nuk ia doli dot të shkatërronte opozitën, atë që i prishi ëndrrën për mbretërim. Nuk ia doli të shkatërronte pengesën për mbretërimin e përjetshëm. Edhe pse na e burgosi liderin tonë, fund e krye pa prova, fakte, ne jemi për t’i thënë Ramës se opozita është këtu, është në këmbë, e papërkulur, e bashkuar, gjithë energji. Edhe pse korruptoi Mcgonigalin për non- gratën e Berishës, përsëri Rama nuk ia doli, pasi ne e kemi luftën për liri. Mcgonigal në SHBA u dënua për aferën me Ramën, në atë dosje Rama është edhe korruptues edhe i korruptuar. Sot i themi Ramës nuk të njohim më për kryeministër”, - tha Noka.