Basha premton hapjen e dosjeve: Shqipëria ka nevojë për lustracionin

Në 33- vjetorin e rrëzimit të monumentit të diktatorit Enver Hoxha, Lulzim Basha foli për rëndësinë e procesit të lustracionit në shoqërinë shqiptare. Sipas Bashës, dosjet e ish- Sigurimit të Shtetit vazhdojnë të luajnë një rol në kontrollin politik të Shqipërisë sonë. Kreu demokrat në fjalën në forumin “Përballja me të kaluarën/ Multiperspektiva në histori”, në kuadër të 20 shkurtit, tha se më shumë se një gjeneratë pas rrëzimit të bustit, instrumentet e diktaturës mbeten të pacenuara, referuar procesit të lustracionit. “Dosjet famëkeqe vijojnë të luajnë rol në kontrollin politik të shoqërisë. PD ka dërguar prej kohësh në Kuvend një propozim që synon lustracioni pra hapjen e plotë të dosjeve. Hapja e dosjeve, një premtim i pambajtur 33- vjeçar i PD dhe sot është dita t’u kërkojmë ndjesë shqiptarëve, e në veçanti të përndjekurve politikë në këtë dështim, pa asnjë ekzagjerim epokal. Në veçanti, në periudhën që po përjetojmë të ringjalljes së rivaliteteve të vjetra gjeostrategjike, të ringjalljes së aspiratave sunduese të Rusisë Putiniste dhe aleatëve të vet të fshehur në Ballkanin Perëndimor, mezi fshihen tani kanë filluar të dalin dhe hapur, siç është Serbia e Vuçiçit, është jetike që institucionet përkatëse, autoritetet në bashkëpunim me institucionet shqiptare të ligjzbatimit dhe të zbulimit të ekspozojnë agjenturën e KKB- së dhe UDB- së në Shqipëri. Ekspozimi i agjenturës jugosllave dhe sovjetike në Shqipëri nuk është hap që thjesht duhet të ndërmerret në funksion të transparencës, por dhe në funksion të një qëllimi shumë më të madh që është siguria kombëtare. Natyrisht kjo është një thirrje që u drejtohet institucioneve, por PD do të hedh dhe hapin konkret të institucionalizimit të kërkesës që këto dy rrjete të agjenturës dhe rezidenturës të dy shërbimeve ndër më armiqësoret ndaj interesave kombëtare dhe sigurisë kombëtare të Shqipërisë të mos gëzojnë më mbrojtjen e pakuptimtë që i jepet duke i mbajtur të fshehta emrat, të dhënat e këtyre dy organizatave , të cilat nuk kanë pasur asnjëherë një qëllim tjetër përveç sabotimit, minimit të interesave kombëtare, shqiptare”, - tha ai.