Këlliçi: E drejta e fjalës nuk negociohet me patronazhistët

Një ditë pas protestës së opozitës, Belind Këlliçi apeloi që të lirohen qytetarët e arrestuar. Ai bën thirrje që të ndalen provokimet ndaj opozitës dhe se duhet të respektohen të drejtat e tubimit qytetar. Sipas Këlliçit, “angazhimi i policëve civilë për të intimiduar, goditur dhe arrestuar protestuesit e opozitës është shenja se pushteti ka frikë nga ju dhe nga opozita”. Ai paralajmëron se çdo polici abuziv do t’i çohet ligji te dera, “çdo shkelësi do t’i kujtojmë se interesat e qytetarëve, e drejta e fjalës dhe protestës, nuk mund të negociohen me patronazhistët e pushtetit”. “Partia Demokratike siguron të gjithë protestuesit se ne do t’u dalim zot. Tubimi i djeshëm, i qindramijëra shqiptarëve është siguresa e garancisë se në këtë vend është sovrani që e ushtron pushtetin dhe ata qeveritarë në kryeministri dhe ata policë me uniformë janë vetëm qiraxhinj në shtetin e shqiptarëve. Taulant Balla, Muhamet Rrumbullaku e të tjerë, të bëjnë kujdes! T’u thonë zelltarëve partiakë në polici se nuk i mbron asgjë para së drejtës dhe ligjit. Nuk mund të fshihen dhe nuk mund të marrin garanci paprekshmërie nga ata që as vetë nuk i kanë këto garanci! Kush prek demokratët, do të përgjigjet një më një. Çdo procedim, ndalim apo abuzim me protestuesit e djeshëm do të marrë përgjigje ligjore dhe qytetare. Çdo polici abuziv do t’ia çojmë ligjin te dera, çdo shkelësi do t’i kujtojmë se interesat e qytetarëve, e drejta e fjalës dhe protestës nuk mund të negociohen me patronazhistët e pushtetit”, - tha Këlliçi.