Legalizuan pallatin me 4 kate pa leje, pezullohet kreu i Kadastrës së Lezhës

Drejtori Gentian Malotaj dhe përgjegjësi i legalizimeve, Artur Shabaku vepruan në kundërshtim me ligjin, nën hetim edhe ndërtuesi

Brenda pak javëve Prokuroria e Lezhës godet për të dytën herë Drejtorinë e Kadastrës së këtij qarku. Pas 11 punonjësve, tashmë radhën duket se e kanë pasur kreu i kësaj drejtorie dhe përgjegjësi i Legalizimeve.

Ata janë vënë nën akuzën e shpërdorimit të detyrës në lidhje me një pallat të ndërtuar në zonën e Kunes dhe ku mësohet se është 4 kat pa leje. Hetimet kanë çuar në pezullimin nga detyra të dy zyrtarëve të lartë lokal, ndërkohë që është vënë nën akuzë edhe vetë ndërtuesi i godinës. Kështu numri i të ndëshkuarve në këtë drejtori ka shkuar në 13, ndërkohë që pritet vendimi i Apelit në lidhje me rikthimin e tyre në punë.

PEZULLIMI

Sipas të dhënave që vijnë nga Lezha, bëhet me dije se drejtori i Kadastrës së Lezhës, Gentian Malotaj dhe përgjegjësi i legalizimeve Artur Shabaku janë pezulluar nga detyra dhe ndaj tyre ka nisur një hetim nga Prokuroria e Lezhës për veprën penale “Shpërdorim Detyre”. Të dy zyrtarët e Kadastrës akuzohen se kanë legalizuar një pallat në zonën e Kunes në Shëngjin duke shkelur ligjin, pasi kompania ndërtuese kishte ndërtuar edhe 4 kate pa leje, thotë prokuroria.

Prokuroria pretendon se më datë 10.08.2021 Bashkia e Lezhës ka miratuar dhënien e leje për ndërtimin e këtij pallati në rrugën ‘ Fran Ivanaj’, Ishull- Shëngjin. Sipas lejes së dhënë, ishte parashikuar që ku subjekt do të shërbente si hotel dhe duhej të ndërtohej 6 kate plus 1 kat nën tokë. Por, kompania me administrator A. U. Thuhet se ka shkelur lejen e ndërtimit dhe ka ndërtuar 10 kate plus 1 kat. Në materialin hetimor fiksohet se: “Objekt i referuar lejes së ndërtimit është “Godinë e kombinuar shërbimi dhe banimi me 2- 6 kate mbi tokë dhe 1 kat në nëntokë”, kurse sipas inspektimit të gjendjes faktike rezulton që objekti të jetë “Godinë e kombinuar shërbimi dhe banimi me 2- 89- 10 kate mbi tokë dhe 1 kat nën tokë”, thuhet në dosjen hetimore. Pavarësisht kësaj shkelje, dy zyrtarët e Kadastrës kanë legalizuar subjektin dhe për këtë arsye prokurorja Iva Harka ka kërkuar pezullimin e tyre nga detyra, kërkese që është miratuar nga Gjykata e Lezhës. Por dy zyrtarët kanë animuar vendimin në Gjykatën e Apelit në Tiranë. Sipas të dhënave hetimore, mësohet se hetimi ka nisur në kohën kur mes administratorit të firmës ndërtuese dhe disa banorëve në zonën ku po ndërtohej. Dhe ka qenë konkretisht ky fakt që ka vënë në lëvizje prokurorinë që edhe ka konkluduar më vonë, gjithnjë sipas prokurorisë, shkeljen me 4 kate njëherësh në një pallat në Kune. Rasti për konfliktin e tyre ishte referuar në

Prokurori dhe më pas kanë nisur verifikimet, ku organi i akuzës më pas thotë se ka zbuluar shtesat e pamiratuara në godinën- hotel. Kështu pezullimi i dy zyrtarëve të Kadastrës, vjen pak kohë pasi 11 punonjës po ashtu u pezulluan nga detyra 11 punonjës të tjerë të Kadastrës me akuzën për moszbatimin e një vendimi gjykate për mos kthimin në tokë shtet 234 mijë metra katrorë të tjetërsuar në zonën e Ranës së Hedhur në Shëngjin, për të cilën u dënuan me burg ish- zyrtarë lokal të Lezhës. Tashmë pritet një tjetër betejë ligjore mes palëve, pasi konfliktet për pronat e kanë kthyer Lezhën, kryesisht bregdetin, në një nga zonat që gjeneron më së shumti konflikte në vendin tonë.