U gjunjëzuan me zhvlerësimin e euros, 4 miliardë lekë garanci për biznesin fason

Qeveria rishikon buxhetin për vitin 2024, rriten pritshmëritë për të ardhurat Ministri Mete: Mbështesim këtë sektor përmes garancisë shtetërore të huasë për sigurimin e financimit të duhur nga bankat e nivelit të dytë

Në mbledhjen e djeshme, qeveria ndryshoi sërish buxhetin e shtetit përmes një akti normativ, duke vendosur në dispozicion të bizneseve fason rreth 40 milionë euro ose 4 miliardë lekë si garanci sovrane për kredi që ky biznes do të marrë nga bankat e nivelit të dytë.

"Përmes këtij Akti Normativ po mbështesim një Instrument të Garancisë Shtetërore prej 4 miliardë lekë në mbështetje të bizneseve të sektorit të industrisë përpunuese fason, të cilat kanë nevojë të përmirësojnë proceset teknologjike dhe të rrisin më tej produktivitetin, kjo edhe për të përballuar efektet e goditjeve të ardhurave si pasojë e faktorëve të jashtëm. Ky instrument synon mbështetjen e këtij sektori nëpërmjet garancisë shtetërore të huasë, me qëllim sigurimin e financimit të nevojshëm nga bankat e nivelit të dytë", u shpreh ministri dje pas mbledhjes së qeverisë.

Prej një viti, biznesi fason është përballur me sfidën e zhvlerësimit të euros karshi lekut. Humbjet nga kursi i këmbimit, sipërmarrës të këtij sektori i përllogarisin në mbi 20 milionë euro. Ata kanë kërkuar ndërhyrjen e qeverisë, duke propozuar rimbursim për humbjet nga kursi, ose lehtësim të barrës fiskale.

Ndërkohë, ministri i Financave, Ervin Mete, tha gjithashtu se janë rishikuar në rritje të ardhurat për vitin 2024, të cilat projektohen në rreth 687 miliardë lekë ose 28.2 për qind e Produktit të Brendshëm Bruto.

MINISTRI

Në komunikimin me mediat, pas mbledhjes së qeverisë, ministri i Financave, Ervin Mete, u shpreh se nëpërmjet këtij Akti Normativ, qeveria do t'i vijë në ndihmë sektorit fason, me Instrumentin e Garancisë së re Shtetërore prej 4 miliardë lekësh, në mënyrë që ky sektor të përballojë efektet e goditjeve, të përmirësojë proceset teknologjike dhe të rrisë më tej produktivitetin.

Ministri Mete informoi se Ministria e Financave ka rishikuar në rritje të ardhurat për vitin 2024, të cilat projektohen në rreth 687 miliardë lekë ose 28.2% e Produktit të Brendshëm Bruto, ndërsa në nivelin makro do të vijohet konsolidimi fiskal, duke projektuar një trend rënës të borxhit publik dhe një deficit më të ulët sesa projeksioni fillestar i buxhetit të këtij viti.

Ministri tha se Akti Normativ parashikon reflektimin në buxhet të riorganizimit të ministrive sipas fushave të reja të përgjegjësisë, ashtu sikurse riklasifikimin e kategorisë së financimit të portit të ri tregtar, financimin e strukturës së posaçme në mbrojtje të mjedisit dhe zhvillimit të turizmit, si edhe mbështetjen financiare për rikonstruksionin e godinave dhe përmirësimin e kushteve infrastrukturore të arsimit profesional, në kuadër edhe të vëmendjes së qeverisë për këtë sektor.

Gjatë fjalës së tij, ministri i Financave risolli edhe njëherë në vëmendje faktin se ekonomia performoi mirë gjatë vitit të kaluar dhe u shpreh më tej se, në mbyllje të vitit buxhetor 2023, rezulton se treguesit kryesorë makro- ekonomikë patën përmirësime të ndjeshme, duke vijuar një trend pozitiv, që pritet të jetë i tillë edhe gjatë vitit 2024. "Niveli i të ardhurave arriti në 643 miliardë lekë, ose mbi 6 miliardë euro, me rritje prej 12.3% krahasuar me vitin 2022 dhe kjo performancë e mirë po vijon edhe në muajt e parë të vitit 2024, sipas të dhënave të deritanishme.

Gjatë vitit të kaluar, kontributet e mbledhura në skemën e sigurimeve shoqërore arritën në 5.7% të PBB- së, duke ulur ndjeshëm deficitin e skemës, në afro 0.8% të PBB- së, niveli më i ulët i regjistruar ndonjëherë", u shpreh ministri Mete. Duke iu referuar shifrave, ministri tha se borxhi publik zbriti në 59.2% në fund të vitit 2023, nivel ky më i ulët se periudha para pandemisë dhe gjithashtu më i ulëti që nga viti 2010, ndërsa balanca primare në fund të vitit 2023 u rikthye në pozicion pozitiv dhe deficiti buxhetor shënoi nivelin prej 1.4% të PBB- së.