Protesta, Berisha: Të vazhdojmë betejën për një qeveri teknike

Përpara mbështetësve të tij, ish- kryeministri Sali Berisha denoncoi se në Parlament votuan trafikantët e kullave. Ish- kryeministri akuzoi kreun qeverisë, Edi Rama se udhëton me avion privat dhe se me të transportohen tonelata droge. Kreu i demokratëve u bëri thirrje mbështetësve të vazhdojnë betejën për një qeveri teknike dhe zgjedhje pa Edi Ramën. Lideri demokrat komentoi nga ballkoni i banesës para mbështetësve të tij gjendjen e rrugëve në vend, ku u shpreh se shemben sepse sipas tij “u hidhet bukë peshku”. Berisha u shpreh se rrugëve po u ndryshohen trajektoret që vjedhja të bëhet tërkuzë. “Çdo ditë lajme që kanë në themel vjedhjen. Po pse shemben rrugët? Rrugët shemben se vidhen paratë dhe hidhet jo materiali që duhet, por bukë peshku. Po pse ndryshohen trajektoret e rrugëve? Ndryshohen që vjedhja të bëhet tërkuzë. Po pse ndahen rrugët në dhjetëra e dhjetëra lote? Që të mund të vidhet dhjetëra e dhjetëra herë. Të gjitha këto janë realiteti më i hidhur, që vrasin çdo ditë gjendjen ekonomike të shqiptarëve, varfërojnë, mjerojnë ata”, - tha Berisha. Ai u ndal te reforma në drejtësi, ku u shpreh se, “Edi Rama ka krijuar mburojën më të tmerrshme gjyqësore, të vjedhjeve të tij monstruoze dhe të qeverisë së tij”. “Edi Rama me reformën në drejtësi ka krijuar mburojën më të tmerrshme gjyqësore, të vjedhjeve të tij monstruoze dhe të qeverisë së tij. Nuk ka asnjë proces ndaj asnjë personi që nuk përcaktohet nga Edi Rama. Karakteri i kësaj drejtësie është më kriminali që ka ekzistuar. Çdo vendim shtyhet ne zyrat e Edi Ramës dhe dërgohet në SKAP apo në Gjykatë, që janë të mbushur me anëtar të grupeve kriminale”, - tha ish- kryeministri.