Adriatik Llallës i sekuestrohet apartamenti kthehet në qendër sociale
Balla: Rezultat i prekshëm i reformës në drejtësi, një mesazh kundër skeptikëve Prona e ish- kreut të Prokurorisë së Përgjithshme u bllokua nga SPAK, ambasadori i BE: I përkiste një ish- prokurori të korruptuar!
Apartamenti i cili më parë ka qenë pronë e ish- kryeprokurorit Adriatik Llalla tashmë është sekuestruar dhe është kthyer në një qendër për sipërmarrje sociale dhe për t’u ardhur në ndihmë grupeve dhe komuniteteve vulnerabël.
Kjo banesë që ndodhet në shëtitoren e Plazhit të Durrësit dhe është sekuestruar me vendim të Gjykatës së Posaçme kundër Krimit të Organizuar dhe Korrupsionit, është kthyer në “Qendrën Art dhe aktivizëm”. I pranishëm ishte edhe ministri i Brendshëm, Taulant Balla, i cili tha se ky është një rezultat i prekshëm i reformës në drejtësi dhe një mesazh i qartë për të gjithë skeptiket e drejtësisë së re. “Sot jemi, do ta quaja si qershi mbi tortë, në një pronë që është sekuestruar me vendim të Gjykatës së Posaçme kundër Krimit të Organizuar dhe Korrupsionit ndaj një zyrtari të lartë shtetëror, i cili këtë apartament nuk e justifikonte dot me të ardhurat e veta. Ky është një rezultat i prekshëm i reformës në drejtësi dhe një mesazh i qartë kundër gjithë skeptikëve dhe kundërshtarëve të reformës në drejtësi, sepse e vërteta është se sot, në Shqipëri ka dy palë: një palë që mbështet reformën në drejtësi dhe një palë tjetër që është kundër. Ky apartament sot është shembulli më kuptimplotë ndaj gjithë skeptikëve se ja pra, se pasuritë e krijuara për shkak të përfshirjes në grupe kriminale apo për shkak të korrupsionit, po sekuestrohen. Lajmi më i mirë që ne mund të japim është që, e para, ne kemi marrë një vendim, Drejtori është këtu, që asnjë prej pasurive të sekuestruara apo të konfiskuara, nuk do të privatizohet më. Kemi mësuar ne, edhe unë u desh të mësoja nga prokurorët antimafia javën e kaluar në Itali, se nëse do të shkonin për privatizimin e tyre, shanset që ato të rikthehen te ish- poseduesit, janë shumë të mëdha”, - nënvizoi Balla në ceremoninë ku ishte i pranishëm dhe ambasadori i BE- së.
AMBASADORI I BE- SË
Ambasadori i BE në Shqipëri, Silvio Gonzato, ka marrë pjesë në përurimin e një sipërmarrje sociale në Durrës, e cila është hapur në apartamentin, i cili më parë ka qenë pronë e ishkryeprokurorit Adriatik Llalla. Pasi u sekuestrua, banesa e Llallës tashmë është kthyer në një qendër arti për t’i ardhur në ndihmë grupeve dhe komuniteteve vulnerabël. Në një reagim në “X” Gonzato ka ndarë momente nga inaugurim i qendrës ndërsa shkruan se ishte dëshmitar se si pasuritë e fituara përmes korrupsionit dhe krimit mund t’i kthehen komuniteteve lokale. “Sot përuruam ‘ Qendrën e Artit dhe Aktivizmit’ në një apartament që më parë i përkiste një ish- prokurori të korruptuar”, - shkruan ai në “X”.
POSTIMI I PLOTË:
Korrupsioni dhe krimi i organizuar grabisin burimet që i përkasin komunitetit. Në Durrës isha dëshmitar se si pasuritë e fituara përmes korrupsionit dhe krimit mund t’i kthehen komuniteteve lokale. Sot përuruam “Qendrën e Artit dhe Aktivizmit” në një apartament që më parë i përkiste një ish- prokurori të korruptuar. Një sipërmarrje sociale e mundësuar nga projekti TWIST, financuar nga BE- ja, qendra pret krijues të rinj që të mësojnë teknika të reja dhe të prodhojnë art. Qendra është rezultat i partneritetit mes BE- së, qeverisë shqiptare, Bashkisë së Durrësit dhe shoqërisë civile AL dhe IT. Siç i thashë dhe ministrit Taulant Balla, ne duhet ta përshkallëzojmë këtë lloj projekti. Krijimi i një Zyre për Rikuperimin e Pasurive mund të jetë një kontribut i mirë”. Adriatik Llalla ndodhet në arrati prej vitit 2021. Ai u dënua me dy vjet burg nga Gjykata e Posaçme për Korrupsionin dhe Krimin e Organizuar në pranverë të vitit 2021, por vendimi nuk u ekzekutua asnjëherë pasi Llalla u largua nga vendi drejt Italisë. Vendimi mori formë të prerë më 22 shtator të atij viti, duke iu konfiskuar edhe pasuritë e dyshuara si të fshehura.