Durrës, hapet Konsullata e Sllovenisë, "kapitull i ri mes dy vendeve"
Dy ditë më parë, u çel zyrtarisht në Durrës, Konsullata e Republikës së Sllovenisë, kryesuar nga Konsulli i Nderit, z. Genci Likoskëndaj. Në ceremoni morrën pjesë përfaqësues nga trupi diplomatik, autoritetet lokale, fusha e biznesit, media, artistë e shumë të ftuar të tjerë.
Në fjalën e hapjes së mbajtur me këtë rast, ambasadori i Sllovenisë në Shqipëri, z. Peter Japelj, vuri në dukje se Konsullata në Durrës përfaqëson një kapitull të ri në marrëdhëniet mes dy vendeve. "Nuk kam asnjë dyshim se puna e konsullit dhe e konsullatës do të kontribuojë në thellimin e marrëdhënieve tashmë të shkëlqyera dhe miqësore mes Sllovenisë dhe Shqipërisë", theksoi ambasadori Japelj.
Konsulli i Nderit të Sllovenisë në Shqipëri, z. Genci Likoskëndaj, gjatë fjalës së mirëseardhjes, shprehu kënaqësinë e tij për hapjen e Konsullatës së Nderit në qytetin e Durrësit.
"Konsullata e Nderit përfaqëson një hap përpara në drejtim të forcimit të bashkëpunimit mes Sllovenisë dhe Shqipërisë", tha z. Likoskëndaj.
I pranishëm në këtë ceremoni ishte edhe nënkryetari i Bashkisë së Durrësit, z. Elio Jani, i cili çmoi hapjen e Konsullatës së Nderit të Sllovenisë dhe e konsideroi atë si vlerë të qytetit, në shërbim të rritjes së mëtejshme të turizmit në qytetin bregdetar.
Konsullata e Nderit do të shërbejë si urë lidhëse mes Shqipërisë dhe Sllovenisë dhe do t'i mbajë dyert e hapura çdo lloj mbështetjeje për shkëmbimet reciproke në të gjitha fushat, lehtësimin e tregtisë dhe rritjen e pratmeritetit ekonomik dhe kulturor mes dy vendeve.