Turam rikthehet në Madrid, vjen ora e Kristjan Asllanit
Markus Turam mund të luajë në ndeshjen e kthimit kundër Atletikos së Madridit në Spanjë. Ose më mirë, ky është objektivi që ka lojtari dhe parashikimi i bërë pas ekzaminimeve të bëra ditën e djeshme. Francezi ka një zgjatim të aduktorit të kofshës së djathtë. Parashikimet kanë patjetër një marzh gabimi, por për këtë lloj problemi pritet që të qëndrojë jashtë fushave të lojës për 15- 20 ditë. Për momentin Interi nuk ka ndërmend aspak që ta rrezikojë apo ta forcojë lojtarin për t'u rikthyer sa më shpejt. Objektivi maksimal është që ta ketë gati 100% për duelin e 13 marsit në Madrid. Për ta bërë këtë, do të ishte ideale që ta kenë gati për pak minuta ndaj Bolonjës në kampionat. Në këtë mënyrë, ai do të humbasë 3 ndeshjet e radhës: Leçe, Atalanta dhe Xhenoa. Për këto duele do të ketë hapësirë për Arnautoviç dhe Sançez.
ASLLANI- Mirëpo ndryshimet në sulm nuk janë të vetmet që do të bëjë trajneri Inzagi në prag të ndeshjes me Leçen. Sfidat janë të ngjeshura dhe shumë afër njëratjetrës, prandaj pak pushim duhet edhe për mesfushorët. Kristjan Asllani pritet që të marrë një fanellë titullari përpara mbrojtjes ashtu si Davide Fratezi në vendin e Barelës ose Mkitarian. Kjo mbetet për t'u parë. Asllani u përfol që do të luante nga minuta e parë edhe në sfidën kundër Salernitanës, por trajneri ndryshoi mendje për të luajtur me titullarët. Ky është një shans i mirë për Asllanin që po stërvitet për të qenë gjithmonë i gatshëm për trajnerin dhe për skuadrën kur ajo të ketë nevojë. Po ashtu, pritet që edhe në krahët e mesfushës të ketë ndryshime. Karlos Augusto pritet të luajë titullar. Ende e paqartë është situata për mbrojtjen, nëse do të ketë ndryshime apo do të luajë treshja Pavar- AçerbiBastoni.