PD, padi ndaj policisë për dhunimin e protestuesve
Gjykata vendos “Detyrim paraqitje” për 4 protestuesit e 20 shkurtit Bardhi: Janë rrahur protestuesit nga policia. Reagon Balla: Askush të mos guxojë të ngrejë dorë kundër Policisë së shtetit
Gjykata e Tiranës vendosi dje masën e sigurisë “Detyrim paraqitje” për protestuesit e ndaluar nga Policia e Tiranës gjatë protestës së thirrur nga grupimi i “R i t h e m e l i m i t ” ditën e martë në mbrëmje.
Ata akuzohen se kanë hedhur molotovë, flakadanë dhe kapsolla në drejtim të Policisë së Shtetit, e cila ishte rreshtuar përballë institucionit të Këshillit të Ministrave. Gjykata, pasi u njoh me pretendimet e Prokurorisë dhe palës mbrojtëse, vendosi ndaj katër protestuesve të ndaluar masën e sigurisë “Detyrim paraqitje”. Bëhet fjalë për Kindi Tolin, Andrea Malian, Bledar Kolën, Ismet Stefanis. Ndalimet e protestuesve u realizuan nga strukturat e Komisariatit të Policisë Nr. 1, në drejtimin e Prokurorisë pranë Gjykatës së Shkallës së Parë të Juridiksionit të Përgjithshëm Tiranë, ku u arrestuan në flagrancë shtetasit: K. T., 21 vjeç, A. M., 18 vjeç, B. K., 37 vjeç, dhe I. S., 33 vjeç. Ndërkohë u proceduan penalisht në gjendje të lirë shtetasit: A. I., 20 vjeç, R. Sh., 20 vjeç, M. M., 20 vjeç, M. S., 19 vjeç, G. P., 22 vjeç, dhe D. Th., 21 vjeç. Seanca në gjykatë u ndoq edhe nga deputetë të Rithemelimit.
AKUZAT
Kreu i grupit të opozitës, Gazment Bardhi, foli dje për mediat para Gjykatës së Shkallës së Parë të Juridiksionit të Përgjithshëm, ku 4 të rinjtë e arrestuar pas protestës së opozitës, u njohën me masat e sigurisë. Ai denoncoi se policia ka ushtruar dhunë ndaj protestuesve dhe për këtë ka kallëzuar dhe ankimuar tek Autoriteti i Mbikëqyrjes Policore, veprimtarinë e policisë. Ai njoftoi se është dorëzuar një kallëzim penal dhe ankimim në AMP, në lidhje me punonjësit e policisë të cilët kanë ushtruar dhunë
ndaj protestuesve të shoqëruar. “Gjykata vërtetoi sot që Andrea, Kindi, Ismeti dhe Bledari ishin për rreth dy ditë të marrë peng nga policia, si të burgosur politikë të regjimit të Ramës. Dua të denoncoj me forcë dhunën vandale që kanë ushtruar punonjës policie ndaj këtyre pro
testuesve të arrestuar, të marrë peng për rreth 2 ditë. Ndaj tyre është bërë kallëzim penal dhe një ankesë në AMP”, tha Bardhi. “Dua secilit prej tyre t’i bëj një paralajmërim publik që dhuna jashtë asaj që lejon ligji është akt personal dhe ka pasoja personale. Çdo punonjës do të duhet
të respektojë ligjin. S’kanë bërë rezistencë, janë dhunuar gjatë shoqërimit në komisariat dhe brenda dhomave, do të duhet të mbajnë përgjegjësi personale. Janë identifikuar me emër, janë 3 punonjës, dy të grupit që i ka shoqëruar dhe një tjetër punonjës i komisariatit. Dy kanë
shenja të dukshme të dhunës në fytyrë dhe dy të tjerët kanë fraktura në trup nga dhuna që ka ushtruar Policia e Shtetit me urdhër politik nga zinxhiri komandues”, - u shpreh Bardhi.
REAGIMI
Ministri i Brendshëm, Taulant Balla, ka reaguar pas paralajmërimit të kreut të grupit të opozitës, Gazment Bardhi, se do të padisë efektivët që dyshohet se dhunuan protestuesit gjatë tubimit të “Rithemelimit” më 20 shkurt. Balla deklaroi nga Korça, se askush të mos guxojë të ngrejë dorë kundër Policisë së Shtetit pasi do të përballet me ligjin. Ministri Balla u shpreh se protestuesit kanë pasur qasje dhune ndaj efektivëve dhe institucioneve gjatë protestës së opozitës para Kryeministrisë. “Është në të drejtën e çdo qytetari të vendit që të kallëzojë dhe u takojnë institucioneve të drejtësisë që t’i shqyrtojnë ato me vëmendjen më të madhe. Por besoj biem të gjithë dakord që aktualisht në Shqipëri ka dy palë, një palë të rreshtuar kundër reformës në drejtësi dhe kundër drejtësisë dhe një palë tjetër që po bën gjithçka që reforma në drejtësi të shkojë përpara dhe mendoj se policia e shtetit në rasti që ju referoni ka bërë detyrën dhe vetëm detyrën. Unë e kam thënë sa herë më është dhënë mundësia, askush të mos guxojë të ngrejë dorë kundër policisë së shtetit, ligji është shumë i qartë dhe kushdo që do tentojë të ngrejë dorën kundër policisë së shtetit do përballet me ligjin. Në rastin në fjalë ka pasur një qasje dhune ndaj Policisë së Shtetit dhe ndaj institucioneve”, - tha ministri i Brendshëm.