Humbet Junajtid, habit Ten Hag: Jemi në drejtimin e duhur

Erik ten Hag këmbëngul se Mançester Junajtid po lëviz në drejtimin e duhur dhe e ardhmja duket shumë e mirë, pavarësisht humbjes 2- 1 në shtëpi me Fulhamin. Skuadra e Marko Silvës i shkaktoi "djajve" humbjen e tetë të merituar në shtëpi në të gjitha kompeticionet këtë sezon, me golin dramatik të Aleks Iuobiit në minutën e 97- të, që përcaktoi tre pikët. Junajtid ishte inekzistent në sulm për periudha të gjata të ndeshjes në "Old Trafford", me Rasmus Hojlundin e dëmtuar dhe Omari Forsonin, i cili e nisi ndeshjen e parë si titullar, preferuar në vend të Antonit. Por vendësit pësuan humbjen e parë që kur bashkëpronari i ri, Sër Xhim Retklif, mori zyrtarisht letrat e pronësisë. Rezultati dhe paraqitja ngrenë sërish dyshime në lidhje me të ardhmen e Ten Hagut, skuadra e të cilit renditet e gjashta në Premier Ligë, tetë pikë prapa Aston Vilës së vendit të katërt. Por trajneri ishte pozitiv në konferencën e tij për shtyp pas ndeshjes, duke thënë: "Duhet të shohësh tablonë më të gjerë dhe ajo duket shumë mirë". Përveç Hojlund, Junajtid humbi edhe shërbimet e Kasemiros pas një përplasje në kokë, ndërsa Maunt, Lisandro dhe

Shou mbeten të dëmtuar dhe Ten Hag beson se këto dëmtime janë një faktor në performancën e tyre të dobët këtë sezon. "Ne duhet ta ngremë nivelin në shumë pozicione. Duhet të rikuperojmë dëmtimet, atëherë do të jemi më të ekuilibruar. Ne duhet të forcojmë skuadrën gjithashtu edhe në merkato. Patjetër që jemi në drejtimin e duhur. Kur kemi lojtarë në dispozicion, ne kemi një ekip shumë të mirë. Kemi bërë shumë mirë kohët e fundit. Duhet ta kishim fituar këtë ndeshje, sepse skuadra tregoi karakter të shkëlqyer. Ne bëmë nisje të ngadalta në të dyja pjesët dhe Kasemiro ishte një humbje e madhe. Humbëm pak qendrueshmëri në ekip. Goli ishte shumë i shmangshëm, por ne luftuam në rrugën tonë për t'u kthyer në lojë, kështu që unë duhet të vlerësoj ekipin për shfaqjen e karakterit të madh".