Vendimi i Kushtetueses për pronat, ATP rinis procesin për njohjen e pronësisë

“Deri më datë 22 shkurt, ka përfunduar procesi i shqyrtimit administrativ dhe mbyllja me vendim për 27 kërkesa”

Pak ditë pas vendimit të Gjykatës Kushtetuese për të lënë në fuqi ligjin e kompensimit të pronave, duke rrëzuar ankimimin e Komunitetit Mysliman të Shqipërisë, Agjencia e Trajtimit të Pronave ka rinisur procesin.

Përmes një njoftimi publik, ATP bën me dije këtë dhe një rezyme të punës së kryer me aplkiimet për njohje pronësie. “Agjencia e Trajtimit të Pronave ( ATP) njofton se, duke filluar nga data 16/ 2/ 2024 kur është njoftuar zyrtarisht se Gjykata Kushtetuese e Republikës së Shqipërisë, në datën 13.2.2024, në përfundim të shqyrtimit të çështjes me kërkues Komuniteti Mysliman i Shqipërisë …, ka vendosur rrëzimin e kërkesë dhe heqjen e masës së pezullimit të zbatimit të neneve 1, pika 2 dhe 2, pikat 1 dhe 2, të ligjit nr. 77/ 2022, ka vijuar me trajtimin e kërkesave për njohje pronësie dhe deri më datë 22/ 02/ 2024, ka përfunduar procesin e shqyrtimit administrativ dhe mbylljen me vendim për 27 kërkesa ( dosje, praktika)”, njofton Agjencia duke zyrtarizuar kështu rinisjen e procesit dhe ftuar pronarët të aplikojnë për njohjen e pronësisë.

Në nëntor të vitit të kaluar, Gjykata Kushtetuese vendosi pezullimin e ligjit deri në shqyrtimin e plotë të tij për metodologjinë e caktimit të kompensimit financiar të pronave, pas ankimimit të komunitetit mysliman. Vendimi i fundit i hap rrugën zbatimit të ndryshimeve ligjore pasi garanton një shpërblim më të lartë sesa pragu minimal prej 10%, duke e ruajtur 10%- shin si standard minimal të kompensimit të përcaktuar nga Gjykata Evropian për të Drejtat e Njeriut.

BETEJA LIGJORE

Një muaj pasi shqyrtoi ankesat e Komunitetit Mysliman për disa nene dhe pika të ligjit “Për trajtimin e pronave dhe përfundimin e proceseve kalimtare të pronësisë”, Gjykata Kushtetuese ka vendosur lënien në fuqi të këtij ligji. Më pak se 30% e pronave të Komunitetit Mysliman janë kthyer apo kompensuar ndër vite, ndërsa nga ndryshimet e bëra në ligj u pretendua se preken edhe rreth 160 aplikime të tjera, që rrezikojnë të dalin me vlerë negative, apo të konsiderohen të ezauruara. Ndër të tjera, Komuniteti Mysliman i Shqipërisë kishte kundërshtuar edhe një nen të ligjit të miratuar në 2022 në të cilin përcaktohet se indeksimi i faturës së kompensimit do të bëhet deri në momentin e publikimit të vlerës së kompensimit dhe jo deri në momentin që bëhet ekzekutimi i saj, sikundër është rekomanduar edhe nga Gjykata e Strasburgut.

Gjykata Kushtetuese, pasi mori në shqyrtim kërkesën dhe pretendimet e parashtruara nga kërkuesi, si dhe prapësimet e subjekteve të interesuara, Kuvendit të Shqipërisë, Këshillit të Ministrave dhe Agjencisë së Trajtimit të Pronës dhe me shumicë votash vendosi rrëzimin e kërkesës.

Në fillim të muajit nëntor 2023, pas pranimit të kërkesës për shqyrtim nga Kushtetuesja, Agjencia e Trajtimit të Pronës përmes një deklarate vuri në dukje se ishte pezulluar procesi i shqyrtimit për 7000 dosjeve të patrajtuara, ndërsa rrezikohej edhe djegia e fondit të alokuar për këtë vit që llogaritej në vlerën 2.340 miliardë lekë.

Ndërkohë në fillim të vitit 2024, shoqata “Pronësi me Drejtësi”, ka depozituar pranë Kushtetueses ankimimin për shfuqizin e ligjit të rishikuar në vitin 2022, si edhe vendimet e miratuara në zbatim të tij. Sipas të dhënave zyrtare, nga hyrja në fuqi e ligjit të rishikuar në vitin 2015 e deri në fund të vitit 2023 janë kompensuar 812 familje me një fond rreth 7.9 miliardë lekë, ndërsa janë shpërndarë 717 hektarë tokë nga fondi fizik.