Këshilli Bashkiak i Tiranës, miraton bursat për nxënësit dhe ndihmën ekonomike

Miratimi i familjeve aplikuese që përfitojnë nga programi i ndihmës ekonomike deri në 6 për qind, bursa për nxënësit e arsimit parauniversitar dhe emërtimi i disa prej rrugëve në kryeqytet ishin disa nga vendimet që u morën dje në mbledhjen e Këshillit Bashkiak. Nënkryetari i Bashkisë së Tiranës, Andi Seferi, renditi vendimet e rëndësishme të marra në Këshillin Bashkiak. “Njësitë administrative kanë përcjellë pranë Drejtorisë së Mbrojtjes e Përfshirjes Sociale propozimet për 277 familje për t’u trajtuar në muajin janar 2024 dhe nga këto 110 familje do të trajtohen me fonde të buxhetit vendor, ndërsa 167 familje nga fondi i kushtëzuar 6- përqindshi. Strukturat përgjegjëse propozojnë të trajtohen familjet që kanë në përbërje të tyre familje me më shumë se 4 anëtarë në nevojë, familje me një anëtar në nevojë, familje nga 2- 4 anëtarë në nevojë, familje rome dhe egjiptiane, vajza nëna, gra në nevojë, gra kryefamiljare, të divorcuara, të veja me fëmijë në ngarkim, familje me dy anëtarë dhe në vështirësi për t’u pranuar në tregun e punës. Po ashtu, miratojmë në këtë mbledhje fondin e programit të bllok- ndihmës deri në 6% për 167 familje nga buxheti i bashkisë dhe 110 familje nga fondi i kushtëzuar. Ndërsa me qëllim shfrytëzimin e të gjithë numrit të bursave të miratuar për nxënësit e arsimit profesional në shkollat publike të Bashkisë Tiranë janë shqyrtuar dhe vlerësuar me dokumentacion të rregullt për të kaluar sipas kritereve të VKM- së 666 dhe për të përfituar bursa edhe disa nxënës të arsimit profesional publik për vitin shkollor 2023- 2024”, - u shpreh Seferi.