Ndikimi te të rinjtë dhe 20- vjetori i "Këndit Amerikan të Tiranës"
"Këndi Amerikan i Tiranës" festoi 20- vjetorin. Ambasada amerikane në Tiranë përmes një postimi në rrjetet sociale shprehu falënderime të veçanta për të gjithë ata, që kanë marrë pjesë në programet dhe aktivitetet e shumta gjatë dy dhjetëvjeçarëve të fundit. Në ceremoninë e 20- vjetorit dhe në aktivitetin e hapur për publikun, i ngarkuari me punë i SHBA- vë në Tiranë, David Wisner theksoi rëndësinë e këndeve amerikane në Shqipëri dhe ndikimin që kanë tek të rinjtë shqiptarë. Festës iu bashkuan edhe ministri i Ekonomisë, Kulturës dhe Inovacionit, Blendi Gonxhja dhe drejtori i Bibliotekës Kombëtare, Piro Misha. "I jemi mirënjohës Bibliotekës Kombëtare që ka pritur Këndin tonë Amerikan gjatë këtyre dy dhjetëvjeçarëve dhe veçanërisht Albanit dhe Alketës, dy koordinatorëve tanë të mrekullueshëm të Këndit, që mbështesin programet tona çdo ditë", - shkruhet në postimin e ambasadës amerikane në këtë 20- vjetor të "Këndit Amerikan të Tiranës". "Këndi Amerikan në Tiranë" u përurua më 18 shkurt 2004 nga drejtori i Bibliotekës Kombëtare të Shqipërisë, Aurel Plasari dhe ambasadori i SHBA- ve në Tiranë, James Jeffrey. Misioni i tij është partneriteti në promovimin e vlerave dhe mirëkuptimit të ndërsjellë mes Shteteve të Bashkuara të Amerikës dhe Shqipërisë. Ky shërbim përfshin një gamë të gjerë informacionesh mbi historinë, politikën, letërsinë dhe kulturën e SHBA, si dhe i vjen në ndihmë një numri të madh njerëzish të interesuar mbi lajmet dhe zhvillimet e fundit në këtë vend, po ashtu edhe kërkuesve shkencorë mbi çështje të ndryshme politike, arsimore dhe kulturore. Ky shërbim u ofron informacion të gjithë atyre që duan të studiojnë në universitetet amerikane.