Amnistia, Alibeaj: E mirëpresim tërheqjen e PS nga mospërfshirja e të dënuarve nga GJKKO
Pas tërheqjes së mazhorancës, erdhi edhe qëndrimi i demokratëve të Lulzim Bashës, të cilët refuzuan ta cilësojnë Pazar, votën e tyre pas kësaj tërheqjeje të mazhorancës, duke shtuar një tjetër kusht. Deputeti i PD- së, Enkeled Alibeaj, përsëriti dje kushtin për tërheqjen e nenit të faljes për të dënuarit e GJKKO nga “Amnistia Penale”, për të bashkuar votat me PSnë, që projektligji të kalohet në Kuvend. Alibeaj shprehet se nuk po kërkojnë pazar dhe s’dëshirojnë që të votohen ligje tinëzisht dhe fshehurazi. “Ne e mirëpresim tërheqjen e mazhorancës nga mospërfshirja e të dënuarve për korrupsion nga GJKKO, duke qenë kjo një mbështetje e pakushtëzuar për institucionet e SPAK- ut dhe të GJKKO- së. Japim dakordësinë tonë që në amnisti të përfshihen të gjithë protestuesit, pavarësisht kohës dhe periudhës në të cilën kanë protestuar”, - thekson ai. Deputeti i PD- së shton se gjuha e arrogancës dhe e kërcënimi është e papranueshme. “Partia Demokratike është e vendosur për të votuar vetëm një projektligj për “Amnistinë Penale”, i cili u shërben qytetarëve të thjeshtë dhe të pambrojtur dhe nuk përfshihen në të zyrtarët e hetuar nga SPAK dhe të gjykuar në GJKKO- ja. Të qëndruarit në parime dhe në vlera, për Partinë Demokratike nuk janë kushtëzime, por janë e vetmja rrugë dhe zgjidhje për një amnisti në dobi të njerëzve dhe jo në dobi të të korruptuarve. Për ne, gjuha e arrogancës dhe e kërcënimit është e papranueshme, sepse kemi qenë të qartë dhe vijojmë të jemi në raport me ato që kërkojmë, duke i bërë publike. Partia Demokratike e Shqipërisë nuk kërkon pazar dhe nuk do gjë të votohen ligje tinëzisht dhe fshehurazi, por gjithçka do ta bëjë në transparencë të plotë, ku të prevalojë interesi i publikut. Ne e mirëpresim tërheqjen e mazhorancës nga mospërfshirja e të dënuarve për korrupsion nga GJKKO, duke qenë kjo një mbështetje e pakushtëzuar për institucionet e SPAK- ut dhe të GJKKO- së dhe japim dakordësinë tonë që në amnisti të përfshihen të gjithë protestuesit, pavarësisht kohës dhe periudhës në të cilën kanë protestuar”, - shprehet Alibeaj.