SPAK- u dërgon për gjykim një OPGJ dhe 2 qytetarë për korrupsion

Prokuroria e Posaçme kundër Korrupsionit dhe Krimit të Organizuar Tiranë ka përfunduar hetimet paraprake dhe ka paraqitur para Gjykatës së Posaçme të Shkallës së Parë për Korrupsionin dhe Krimin e Organizuar, kërkesën për gjykim të procedimit penal nr. 180, të vitit 2022, ku akuzohen për korrupsion një oficer i Policisë Gjyqësore dhe 2 qytetarë. Sipas njoftimit të SPAK, bëhet fjalë për dosjen hetimore në ngarkim të Fatbardh Lalës, i akuzuar për veprën penale “Ushtrim i ndikimit të paligjshëm ndaj personave që ushtrojnë funksione publike” dhe “Zbulimi i akteve ose të dhënave sekrete”, Tefta Llagaçit, e akuzuar për veprën penale “Ushtrim i ndikimit të paligjshëm ndaj personave që ushtrojnë funksione publike”, kryer në bashkëpunim, Ermir Llagaçit, i akuzuar për veprën penale “Ushtrim i ndikimit të paligjshëm ndaj personave që ushtrojnë funksione publike”, kryer në bashkëpunim. “Në përfundim të hetimit paraprak, provat e përftuara janë të afta të provojnë tej çdo dyshimi të arsyeshëm se të pandehurit Ermir Llagaçi dhe Tefta Llagaçi, në bashkëpunim me njëri- tjetrin, duke pasur një qëllim të përbashkët, e duke kryer veprime të ndërlidhura midis tyre, i kanë dhënë shumën monetare prej 55.000 lekësh oficerit të Policisë Gjyqësore, Fatbardh Lala, pasi ky i fundit i ka dalë garant dhe u ka siguruar se mund të ushtronte ndikim te funksionarët e drejtësisë, që janë prokurori dhe gjyqtari, të cilët kanë pasur në hetim e më tej në gjykim, çështjen penale në ngarkim të personit nën hetim Ermir Llagaçi, duke konsumuar në këtë mënyrë veprën penale “Ushtrim i ndikimit të paligjshëm ndaj personave që ushtrojnë funksione publike”, kryer në bashkëpunim”, bën të ditur SPAK. “Njëkohësisht provat e përftuara janë të afta të provojnë tej çdo dyshimi të arsyeshëm se i pandehuri Fatbardh Lala, me detyrë oficer i Policisë Gjyqësore, pranë Prokurorisë së Shkallës së Parë të Juridiksionit të Përgjithshëm, Tiranë, ka marrë/ pranuar shumën prej 55.000 lekë, nga të bashkëpandehurit Llagaçi, duke iu premtuar se do të ushtrojë ndikim të paligjshëm, duke shfrytëzuar detyrën e tij si Oficer i Policisë Gjyqësore. Për këtë arsye i pandehuri Fatbardh Lala është akuzuar se ka kryer veprën penale të “Ushtrim i ndikimit të paligjshëm ndaj personave që ushtrojnë funksione publike”, - vijon njoftimi. “Gjithashtu, i pandehuri Fatbardh Lala, duke nxjerrë të dhëna në lidhje me procese penale që kanë lidhje me shtetasin Ermir Llagaçi, si emrin e prokurorit, veprën penale etj., ka konsumuar edhe veprën penale të parashikuar nga neni 295/ a paragrafi i tretë i Kodit Penal.