Samiti në Tiranë, Zelensky: Do të prodhojmë armë të përbashkëta. Rama: Praglufte

Një luftë në Ballkan? Presidenti ukrainas: Putini si Hitleri, mund t’ju hedhë raketa. Rusia do të bëjë çdo gjë për destabilizim

Tirana organizoi dje Samitin Ukrainë– Europa Juglindore me pjesëmarrjen edhe të liderëve të Ballkanit Perëndimor, ku u vu theksi te vazhdimi i ndihmës ushtarake dhe financiare për Ukrainën, ndërsa u paralajmërua për rrezikun që i kanoset Ballkanit Perëndimor nga Rusia.

Samiti nisi me fjalën hapëse të dy bashkorganizatorëve, kryeministri Edi Rama dhe Presidenti i Ukrainës, Zelensky, të cilët në një zë bënë thirrje për të qëndruar krah Ukrainës në betejën e saj kundër agresionit rus dhe nevojën për furnizimin me municione. Putin donte ta fshinte nga harta Ukrainën, por ajo sot është më shumë e ankoruar në Europë. Duam të përsërisim thirrjen të ndalet lufta”, - tha Rama. Nga ana e tij, Presidenti Zelensky falënderoi Shqipërinë për organizimin e samtit. “Regjimi i Putinit duhet të humbasë. Dështimet e tij janë siguria jonë!”, - tha Zelensky duke ftuar liderët e Ballkanit Perëndimor të bashkëpunojnë në prodhimin e municioneve të nevojshme për të sprapsur agresionin rus. Madje, propozoi organizimin e një forumi të përbashkët të sigurisë mes Ukrainës dhe Ballkanit Perëndimor. “Kemi 500 kompani në fushën e mbrojtjes që operojnë në Ukrainë në fusha të ndryshme. Por nuk mjafton kjo të fitojmë mbi Putinin. Ne shikojmë probleme edhe në ofertën për sa u përket municioneve, të cilat ndikojnë kapacitetin tonë në fushat e betejës dhe prandaj jemi të interesuar në bashkëprodhimin e municioneve bashkë me ju dhe me partnerët tanë. Ekipi ynë i qeverisë sonë do të prezantojë të gjitha detajet. Ne propozojmë që të organizohet një forum i posaçëm për sigurinë e mbrojtjes mes Ukrainës dhe Ballkanit, qoftë në Kiev apo një nga kryeqytetet tuaja”, - tha Zelensky. Kurse kryeministri Rama u bëri thirrje shteteve të fuqishme aleate të NATOs se ndihma për Ukrainën nuk duhet të përdoret për politika të brendshme. “Ukraina meriton të mbështetet dhe ndihmohet me të gjitha mjetet e nevojshme për të rezistuar dhe të sigurohet që çdo paqe që do të dalë nga kjo luftë do jetë paqe e drejtë, e mbështetur para së gjithash në planin 10 pikësh të Zelensky, të cilin e mbështesim dhe duam të diskutohet nga të gjitha shtetet. E vetmja zgjidhje që kemi është të rezistojmë ndaj forcave që duan të shpërbëjnë atë që kemi ndërtuar deri tani. Duhet të vazhdojmë të gjithë të jemi së bashku dhe të mobilizojmë lidhjet dhe kapacitetet tona e burimet tona, ajo çka na bën bashkë, institucionet tona, organizatat tona, të bëjmë gjitha që mundemi për të mos e lënë agresionin të shpërblehet. Ne s’mund ta lëmë Rusinë të fitojë, e Ukrainën të humbasë, një rezultat i tillë do ishte i papërballueshëm dhe ekzistenca e BE do ishte në rrezik, një ardhme që është shumë e dhimbshme.

Kjo luftë është edhe për lirinë dhe dinjitetin tonë për një paqe të drejtë për Ukrainën dhe popullin e saj. Shqipëria ka bërë sa mundet dhe do vazhdojë të bëjë edhe më tej. Kemi nevojë për qartësi absolute rreth Ukrainës, solidaritet të palëkundur me Ukrainën”, - theksoi Edi Rama. Edhe Presidenti ukrainas, Volodymyr Zelensky u bëri thirrje shteteve aleate që të mos vonojnë armatimet. Zelensky theksoi se nuk ka asnjë alternativë tjetër përballë një vrasësi si Putin, përveçse të qëndrojnë të bashkuar. Ai e krahasoi presidentin rus, Vladimir Putin me Adolf Hitlerin. “Hitleri part 2, nëse po flasim për Netflix”, - tha Zelensky. “U fol për disa ide se si mund të fuqizohej Ukraina dhe tha se do i ndajë me mua kur të vijë në Ukrainë, në mes të këtij muaji, në mes të marsit. Ai do i ndajë këto ide me mua kur të takohemi, sepse do njoh me hollësi planin e tij. Kur ne ndajmë me njëri- tjetri, nisma iniciativa, këto janë hapi i dytë i katërt, por hapi i parë është mbrojtja. Ne kemi disa pyetje për këto paketa, europianë dhe SHBA. E falënderojmë SHBA, BE dhe Mbretërinë e bashkuar, por duhet të qëndrojmë të fortë se s’kemi alternativë, se të gjithë ne duhet të përballemi me një vrasës. Hitleri part 2, nëse po flasim për ‘ Netflix’. Është një rrezik i madh që i kanoset jetës sonë, të gjithë duhet të përgatitemi që të jemi të fortë, për hapat e tjerë që do marrë Putin. Nëse nuk e bëjmë këtë, ose nëse duam që ai të mos ia dalë mbanë, ne duhet të përgatitemi për luftë, me armatime. Ne dua të jemi të fortë, ne Putin duhet ta mundim”, - theksoi Zelensky. Sipas tij, rreziku për destabilizimin e Ballkanit Perëndimor është i lartë ndaj dhe të gjitha shtetet duhet të j enë të bashkuar. Ai paralajmëroi se Rusia do të përdorë çdo mënyrë për të destabilizuar Rajonin. “Fakti që ndodhemi këtu të gjithë së bashku kemi shembullin historik të marrëdhënieve të ndryshme. Është një mënyrë për t’u mbrojtur, drejt paqes. Unë mendoj se ajo që po ndodh tani është shembulli më i duhur. Ne nuk u kushtojmë vëmendje provokimeve. Shtetet e Ballkanit duhet të jenë bashkë. Rusia do të bëjë diçka për të destabilizuar Ballkanin. Rusia nuk do të ndalet. Rusia do të destabilizojë më tej, nëse do të ketë mundësinë e pauzave dhe do të përdorë taktika të tjera e të ketë ndikim në vendet e vogla”, - tha Zelensky.